Clement heidra av Fritt Ord

– I år er det 20 år sidan karikaturstriden braut ut, der teikningar av profeten Muhammed førte til vald og drap fleire stader i verda, og det er ti år sidan terrorangrepet på Charlie Hebdo-redaksjonen. I dagens urolege nyheitsbilete er teikninga eit uttrykk som treffer svake sider hjå autokratar, med den konsekvensen at teikningar blir sensurerte og teiknarar forfølgde, seier styreleiar Grete Brochmann i stiftinga Fritt Ord.

I grunngivinga heiter det mellom anna at «satiren utfordrar autoritetar og bidrar til debatt og kritikk av personar og fenomen i Samtida».

Tre ulike

62 år gamle Halleraker er kanskje den mest kjende av dei tre i Noreg. Han teikna fast for Bergens Tidende før han byrja i Aftenposten, og «kombinerer eit vestlandsk tvisyn med sans for insisterande detaljar og suveren strek», skriv juryen i grunngivinga si.

46 år gamle Mørland har ein større internasjonal profil. Han «gjer politisk satire i klassisk form og illustrerer utviklinga i britisk og internasjonal politikk og samfunn med eit totalt usentimentalt blikk,» heiter det i grunngivinga. Han har mellom anna teikna for VG, men også for britiske The Times og søndagsutgåva i over 20 år.

Dag og Tids teiknar May Linn Clement (39) frå Norheimsund er den yngste av dei tre. «Ho portretterer norske og internasjonale toppolitikarar, men ho kan også skrive og teikne ope og søkjande om grunnleggjande aspekt ved det å vere menneske i ei (litt for) moderne verd,» skriv juryen.

Under press

I grunngivinga si skriv Fritt Ord at satireteikninga er under press av mellom anna dårleg medieøkonomi og av refusjonar for kontroversielle og kvasse teikningar.

– Frykta for å fornærme eller krenkje autoritetar, minoritetar eller lesarane til avisa blir ikkje mindre i ei tid med krig og uro. I ei global verd blir bilete og teikningar formidla over landegrenser i løpet av sekund, og kan ha eksplosive og valdelege verknader i ein annan kontekst, skriv juryen.

Prisen er Stiftelsen Fritt Ords høgaste utmerking. Prisvinnarane får 600.000 kroner og ein statuett signert Nils Aas. Fjorårsvinnaren var fotograf Harald Henden.

(NPK-NTB)