Ingrid Stenstadvold Ross

Kreft tek ikkje pause

Koronaviruset sette ein stoppar for bøsseaksjonen Krafttak mot kreft. Og gjorde formålet vårt viktigare enn nokon gong.

Dette skulle eigentleg ha vore ein einaste stor hyllest av dei over 20 000 bøsseberarane som skulle gått frå dør til dør under Krafttak mot kreft. For å samle inn mange millionar til kreftformer som få overleve. Men årets aksjon gjekk ikkje heilt slik vi hadde håpa. 

Samme veke som Krafttak mot kreft starta i mars, spreidde koronaviruset seg i stor fart utover verda og i landet vårt. Byar og bygder stengde ned, arrangement blei avlyste, og dei aller fleste av våre ivrige bøsseberarar rakk aldri å gå med bøssa. Det meste av pengane som vi samlar inn, kjem som kontantar på bøssene. Dette gjer at innsamlingsresultata dette året blir ein skugge av målet vårt.

Slik måtte det bli. Å hindre spreiing og beskytte helsa til befolkninga kjem føre alt anna. Samtidig går det skuffande resultatet hardt utover dei som treng oss aller mest – pasientane og deira pårørande. Midlane frå årets Krafttak mot kreft blir øyremerkte kreftformene få vil overleve. Dette er pasientgrupper som har sett få framsteg, altfor lenge. Sjølv om 75 prosent av nordmenn overlever sin kreftsjukdom, er det nokre kreftformer som dei fleste pasientane døyr av. Eit eksempel er den mest alvorlege forma for hjernekreft, der under fem prosent overlever. Denne kreftforma, og fleire andre, fortener framleis eit stort løft.

Artikkelen held fram under annonsen.

Det er eit hav av menneske som fortener takk. Alle dei som stod fram med sine historier i media for å belyse tema dette året. Og stor takk til deg som rakk å gå med bøsse eller hadde tenkt å gjere det. Takk også til deg som skulle selje vaflar, arrangere løp, konsert eller russerevy til inntekt for desse pasientane. Vit at vi set stor pris på den frivillige innsatsen de har lagt ned. Alt låg til rette for at vi skulle oppnå eit fantastisk resultat, for det skal ikkje stå på engasjementet i vestlandsfylket vårt. Til tross for at mange planar måtte avlysast, er det blitt samla inn godt over 2,5 millionar kroner så langt. Mykje takka vere at de kasta dykk rundt og samla inn pengar digitalt når bøssene måtte pakkast bort. Heilt fantastisk å sjå. Vi er så takknemlege for denne innsatsen. Tusen takk!

Kreft tek ikkje pause i krisetider. Det gjer heller ikkje vi. Med koronakrisa som eit nytt hinder i vegen, er formålet vårt viktigare enn nokon gang. Pasientane som har ei kreftform få overlever, treng oss som aldri før. Viss du ikkje har støtta årets Krafttak mot kreft, er det heldigvis ikkje for seint.

Vi i Kreftforeningen vil stå på og jobbe vidare og vi håpar så mange som mogleg fortsatt vil støtte opp om arbeidet vårt i fortsetjinga. Vi ønskjer framleis at fleire skal overleve – uavhengig av kva kreftform dei får.

Tusen takk for at du bryr deg om kreftsaka. Saman skapar vi håp.

Krafttak mot kreft

Kvart år får om lag 34 000 nordmenn kreft. Det vil seie over 90 personar kvar dag.

Kreftforsking har bidratt til at nærare 75 prosent av nordmenn overlever sin kreftsjukdom, og blant nokre kreftformer overleve så mange som 90 prosent.

Berre to av ti overlever lunge-, galleblære-, lever- og matrøyrskreft, og éin av ti overlever bukspyttkjertelkreft. Difor trengs det meir forsking på desse kreftformene.

I årets aksjon samlar vi inn penger til forsking for at fleire skal overlever kreftformer som i dag har høy døyelegheit, samt at dei som blir ramma, skal få gode tilbod og oppfølging.