ORDSKIFTE
Fylkeskommunens distriktspolitikk
Geir Midtun, Ullensvang Reiseliv
«Sterke reaksjonar» melder media om, etter fylkesdirektøren sitt utspel om å spara pengar ved å leggja ned ferjesambandet Kinsarvik–Utne og redusera tilskotet til hurtigbåtruta i Indre Hardanger. Og det skulle berre mangla om det ikkje vart reaksjonar på eit slikt inngripande og drastisk framlegg. Ferja betyr svært mykje for mange fastbuande, svært mykje for næringslivet i Ullensvang, og i reiselivssamanheng er både ferjeturen og båtturen ei unik oppleving. Dei 19+4 millionane fylkesdirektøren tenkjer å spara på nedlegging og nedskjering i Hardanger, utgjer for det første mindre enn 1 prosent av fylkeskommunen sitt budsjett innan mobilitet og kollektiv, og for det andre vil det føra til mindre inntekter og auka utgifter både for reiselivet og anna næringsliv i Ullensvang. Og, som sentrale politikarar alt har påpeika, 80 % av fylket sitt budsjett går til bynære strok, medan berre 50 % av dei føreslegne kutta går dit. Me har nettopp vore gjennom eit fylkestingsval der lovnader om satsing på distrikta var sterkt på agendaen. Det som no er føreslege, er i praksis ei nedbygging av distrikta.
Ferjesambandet Kinsarvik–Utne er arbeidsveg, pendlarveg, skuleveg, snarveg, beredskapsveg og ikkje minst turistveg. Sidan sambandet opna i 1938, har tallause tilreisande segla over fjorden, og dei har skapt ringverknader og arbeidsplassar for turistverksemdene langs fjorden. Det same har hurtigbåten i sommarhalvåret. Det å kunna få ein tur på fjorden er kanskje nettopp det som gjer at turisten vert her ein dag eller to ekstra. Skulle desse tilboda falla vekk, ligg ordet katastrofe snublande nært. Ferjesambandet bind fjordsidene i Ullensvang saman, og skaper med det ein felles bu-, nærings- og arbeidsregion. Og ikkje minst er ferja sikkerheitsventilen når ras og uvêr gjer at vegane langs fjorden må stengjast, eller når straumen vert borte og det hastar å få mannskap på plass. Lokale entreprenørar og handverkarar sparar timevis bak rattet når dei har oppdrag på «hi sido». Hurtigbåten bind saman indre Hardanger og attraksjonane her på ein unik måte, og er med på å stadfesta regionen si rolle som eit reisemål fleire vil koma til. Men, me ser gjerne at båten sin rutetabell vert lagd opp slik at og fastbuande langs Sørfjorden kan sjå båten som snarvegen til «by’n». Det går an.