Biletserie: Den store ryddesjauen

Sekk etter sekk med plastbos vart samla inn i Kvam laurdag.

Det var nemleg duka for den store strandryddedagen i regi av Kvam herad, grendeutvala og Lingalaks AS. Mange innbyggjarar stilte opp i nær sagt heile Kvam for å fjerna noko av det som har hopa seg opp langs strandlina.

Frå Øystese vart det køyrt to turar med ribb til Kvamsøy, der Øystese grendeutval, skuleungdomar og andre frivillige samla avfall i fire timar.

Andre stader samlast dei frivillige fyrst, for så å verta senda til ulike område langs sjøen med eingongshanskar og avfallsposar. HF var innom mellom anna Asalvika på Ljonestangen, der ein gjeng på 11 personar plukka, plukka, plukka og plukka til klokka gjekk mot 14 og loppemarknad og matservering i grendehuset på Innstranda, der Hjorten 4H markerte 4H-dagen i same slengen.

Lingalaks og Hardanger bakeri stilte opp med bollar og brus til alle som deltok, og skal dessutan fjerna sekkene i ettertid. Verksemda var fredag sjølv rundt i kommunen med båtar for å fjerna større gjenstandar frå strandsona. Det var rydda i og kring det kommunale naustet på Kvamsøy, i fjører på Neshalvøya, Hjartnes og på Vikingnes. Fleire konteinarar vart fylte med avfall, fortel Gry Kyrkjeeide på vegner av Lingalaks. Ho rapporterer om mange rare funn. Særleg isopor og skytestreng vart det funne rikeleg av.

Som om ikkje det var nok, har det vore strandrydding i Jondal heile veka, med Bremnes Seashore AS som regissør, og Coop har hatt ryddeprosjekt i Tørvikbygd og Jondal. Med andre ord har det vore ei god veke for dei som er opptekne av å få vekk plast frå naturen.

Leiar for samfunn, kultur og næring i Kvam herad, Jon Nedkvitne, er svært takksam overfor alle som har stilt opp.

Har du bilete frå ryddedugnaden, så send dei gjerne til HF ved å bruka e-postadressa redaksjon@hf.no.