Klorlekkasje frå lastebil – sjåfør send til legevakta

Like etter klokka 12 i dag byrja det lekka natriumhypokloritt frå ein lastebil på veg mot Jondal. Lekkasjen skjedde ved butikken i Tørvikbygd.

Natriumhypokloritt vert hovudsakleg brukt til bleiking og desinfeksjon. Lastebilsjåføren, ein mann i 20-åra, skal sjølv ha fått noko av stoffet på seg, og vart send til legevakta i Norheimsund.

Innsatsleiar Christine Grindstein i Bjørnafjorden og Austefoll lensmannsdistrikt fortel at det eventuelle skadeomfanget er uklart, men at sjåføren var oppegåande, klar og tilsynelatande ikkje alvorleg skadd.

Politiet er usikker på hendingsforløpet.

Bilen hadde 24 kanner med stoffet i lasterommet, med 25 liter væske i kvar kanne. Ein har enno ikkje opna lasterommet, så ein veit ikkje kor mange kanner det har gått hòl på.

Spreiingsfaren er liten med tanke på det som har leke ut av bilen.

Brannvesenet har teke hand om den ytre lekkasjen og lagt ut eit absorberingsmiddel for å samla opp stoffet, fortel Torleif Ones i Kvam brann- og redningsteneste.

Då HF var på staden i 14-tida, venta ein på brannmannskap frå Laksevåg, som har eigne gassverndrakter. Først når mannskap med spesialutstyr kom, ville ein opna bilen. Då ville politiet sperra av vegen, med tanke på gassen som kunne komma ut.

Eit område på 50 meter rundt bilen, som står parkert ved butikken, vart sperra for fotgjengarar. Butikken vart evakuert, og folk busette i nærleiken vart bedne om å halda seg innandørs.

– Dette er truleg eit mindre utslepp som me handterer ganske greitt, men me tek ingen sjansar med eit stoff som kan vera potensielt giftig. Klor er skadeleg for menneske, dyr og miljø, seier han.

Stoffet som har leke ut, utgjer i liten grad nokon fare for miljøet, seier Grindstein.

Stoffet skal ikkje hamna i sjøen, men det verkar det ikkje å vera nokon fare for, seier ho.

Ferjesambandet vart mellombels innstilt, og ferja vart liggande utanfor kaien i Tørvikbygd med bilar og passasjerar om bord. Klokka 13.41 melde Fjord1 om at det er ordinær trafikk i sambandet.