Kan tinga buss i Odda
Startskotet for transportordninga Hentmeg går i Odda i dag. Ho går ut på at folk i Odda kan tinga bussen når dei treng han, i staden for å følgja faste rutetider, opplyser transportselskapa Skyss og Kringom, som slo seg saman ved årsskiftet.
Leiar i utval for samferdsel og mobilitet i Vestland fylkesting, Jannicke Clarke, vil markera oppstarten av Hentmeg saman med direktør Målfrid Vik Sønstabø i Skyss.
Bussen køyrer etter «først til mølla»-prinsippet og hentar deg på næraste busshaldeplass, og køyrer deg til busshaldeplassen som ligg nærast der du skal. Billettprisen er den same som i vanleg kollektivtransport.
Prøveprosjektet er basert på løysinga som kollektivselskapet Kolumbus i Rogaland har i Sauda. Liknande løysingar er å finna i Kongsberg, Bodø og Bø i Telemark.
Målet med prosjektet er meir nøgde kundar og betre bruk av kollektivtransport. Det er betre for miljøet om bussen berre køyrer når det trengst og står i ro når ingen skal reisa.
Området Odda og Tyssedal er valt på grunn av låge passasjertal utanom skulekøyringa, og at reisemåla i Odda ligg sentralt, som fritidstilbod, kommunale tenester og liknande.