Ljones stiller ut

Åse Ljones frå Kvam er ein av tre kunstnarar som opnar separatutstilling hjå Kunstbanken Hedmark kunstsenter på Hamar laurdag. Ljones har samarbeidd med Pål Vigeland om utstillinga Toklang. Deira sjølvstendige arbeid vert monterte i lag i utstillinga, melder kunstsenteret i ei pressemelding.

Verka til Ljones er nye broderi (biletet) utførte for hand på lin. Tekstilane er spente på rammer og broderi på tredimensjonale former. Ljones opplyser at ho er på jakt etter lyset, skinet og rørsla i stilla, og etter det kontemplative og kanskje uendelege i eit avgrensa format.

– Møte med naturen og menneska ligg i botn for alt eg skapar. Eg likar å jobba i seriar, der små endringar kan skapa ein større heilskap, seier ho i presseskrivet.

Ljones utdanna seg ved kunsthandverksskulen i Bergen på 1980-talet, og har hatt ei rekkje separat- og gruppeutstillingar i Noreg, Nederland, Sverige, USA og Belgia. Verka hennar er kjøpte inn av dei tre kunstindustrimusea i Noreg og fleire kunstmuseum, og ho har hatt fleire offentlege kunstoppdrag.

Utstillinga varar til 1. mars.