Publisert 14. januar 2020 kl. 12.15.

Britisk avis skryter av Hardanger

The Telegraph presenterer ni norske nasjonale turistvegar i «verdas beste land for bilferie». Dei ni er ifølgje avisa landevegar ein kan verta overvelda av.

Om turistvegen i Hardanger skriv avisa at det er inkarnasjonen av det Noreg som er vist på postkort, med hagar rike på frukt, fossar og bølgjande, landlege scener. Hardangerfjorden speglar seg i mykje av regionen, som den fjerde lengste fjorden i verda og den nest lengste i Noreg. Hardanger-vegen sveiper rundt fjorden, inn og ut av landskap som varierer mellom dramatiske fjell og grøne åsar. Steinsdalsfossen, Vøringsfossen, Skjervefossen og Furebergfossen skapar ei brusande ramme rundt vegen, med Låtefossen som prikken over i-en.

Frukt har ein dyrka her sidan 1300-talet, og utsal finst langs vegen, der reisande kan smaka friske eple og smakfulle morellar.

Hardanger er eit populært reisemål som kan verta prega av kø i sommarmånadene, konstaterer avisa i England.

– Planlegg ein tur om hausten, når frukta er på sitt saftigaste, eller om vinteren, for å sjå ei anna side av det frodige landskapet! skriv The Telegraph.