Togline kan bli ny turistmagnet på Vestlandet

Når dagens togline mellom Bergen og Voss blir lagd i tunnel, kan den gamle traseen bli ny turistrute for syklistar og vandrarar.

– Dette er ei unik mogelegheit. Potensialet for turistnæringa er enormt, seier kommuneplanleggjar Gjertrud Karevoll i Vaksdal til Bergens Tidende.

I 2024 skal etter planen arbeidet med ny E16 og jernbane mellom Arna og Stanghelle starta. Når han er ferdig, vert dagens jernbanespor liggjande unytta.

Entusiastar vil då bruka den gamle toglina til ein ny gang- og sykkelveg mellom Bergen og Voss. I dag er det ikkje mogeleg å sykla samanhengande mellom Bergen og Voss. Ein ny sykkelveg kan knytast saman med Rallarvegen, noko som betyr at den populære sykkelturen kan starta allereie i Bergen.

Jan Adriansen, som jobbar med å greia ut sykkelvegen på vegner av entreprenørselskapet Sweco, ser eit stort potensial. Han har tidlegare vore med på å gjera Kongestien over Filefjell til ein av dei mest bruka turvegane i landet.

– Akkurat som her i Vaksdal var det mange som ikkje forstod potensialet i ein gjengrodd tursti. I dag er Kongestien eit populært feriemål, med 30.000 besøkjande i sommar og ei blømande turistnæring, seier Adriansen.

Han ser for seg at folk vil stoppa undervegs for å eta på kafear i dei gamle stasjonsbygningane, og kanskje vil dei ynskja å overnatta.

(NPK)