«Trafikklys» kjem etter nyttår

Avgjerda om kva for varselfargar dei 13 produksjonsområda for oppdrett av laks, aure og regnbueaure får, kjem på nyåret, opplyser regjeringa i ei pressemelding.

– Me arbeider med å fargeleggja kysten og ta dei avgjerdene som vert kravde for å gjennomføra konsekvensane av fargelegginga. Dette er ei stor og viktig avgjerd som kan tyda mykje for verdiskaping og arbeidsplassar, men også for villaksen. Me må vera sikre på at me tek dei rette grepa, seier fiskeri- og sjømatminister Harald T. Nesvik (Frp).

Trafikklyssystemet skal sørgja for føreseieleg og berekraftig vekst i havbruksnæringa. Landet er delt inn i 13 område som vert fargelagde annakvart år. Fargen vert sett ut frå korleis lakselusa påverkar villaksen i området, og avgjer om oppdrettarane i området får lov til å veksa eller må redusera.

– Fargelegginga for dei to neste åra vil verta presentert tidleg på nyåret, seier Nesvik.