Publisert 27. oktober 2019 kl. 21.25.

Stipend til kvemmingar

To kvemmingar fekk fylkeskommunale folkemusikk og -folkedansstipend før helga, opplyser Hardanger og Voss museum og Ole Bull akademiet i ei pressemelding.

Ole Gjerde frå Omastrand fekk 50.000 kroner til forsking på og fordjuping i ergonomi og «spelbarheit» på hardingfeler. Han er den fyrste som har fullført bachelorprogrammet i tradisjonsmusikk med fordjuping i hardingfelebygging ved Ole Bull akademiet. Han har sidan starta Gjerde felemakeri og etablert Felemakarscenen.

Ingrid Standal Sørheim frå Vikøy fekk ungdomsstipend på 25.000 kroner. Pengane skal gå til profesjonelle mikrofonar og loop-pedal. Kvemmingen studerer ved Ole Bull akademiet og fordjupar seg i overføring av hardingfeleslåttar frå Hardanger til durspel.

Juryen er rådet for hardingfela.no, der ein av medlemene i møtet var kvemming Per Øyvind Tveiten. Han representerte Hordaland folkemusikklag. Stipenda vart delte ut under Osafestivalen på Voss torsdag kveld. I tillegg til Gjerde og Sørheim fekk Kjersti Wiik og Johanna Mjeldheim stipend. Stipenda skal oppmuntra til kunstnarleg utvikling og styrkja arbeidet med immateriell kulturarv.