Vil setja ned farten på Kvamskogen

Fartsgrensa på Kvamskogen kan verta redusert. Statens vegvesen har sendt på høyring eit framlegg om å setja ned grensa til anten 60 eller 70 kilometer i timen.

Bakgrunnen er meldingar om trafikkfarlege tilhøve og søknader om redusert fartsgrense frå Kvamskogen vel og reisande.

I høyringsbrevet legg vegstellet vekt på visjonen om null drepne i trafikken. Visjonen ber i seg eit ansvar for å leggja til retta for ynskt åtferd og verna mot fatale følgjer.

Framlegget går ut på redusera grensa til 60 kilometer i timen frå toppen av Tokagjelet til Kleiva, ei strekkje på 7,2 kilometer, og til 70 kilometer i timen frå Kleiva til vest for Eikedalsvatnet, ei strekkje på 3,2 kilometer. Reisetida vil auka frå 8 til 10 minutt, ifølgje Statens vegvesen.