Publisert 29. september 2019 kl. 19.00.

Bortesuksessar på fotballbanen

Øystese tok eit steg bort frå nedrykk og Norheimsund eit lite steg nærare opprykk i helga.

Øystese låg under 0–3 etter eit kvarter i bortekampen i 4. divisjon mot Djerv laurdag, men kom svært sterkt tilbake. Før pause sytte Vitor Martelo med to mål og Jens Aase med eitt mål for at laga var like langt igjen. Heimelaget tok leiinga att tidleg i 2. omgang. Didrik Angell sikra ny utlikning etter eit hjørnespark. Etter at Djerv fekk ein spelar utvist, skåra Øystese to mål til og sikra sigeren i sluttminutta, melder oystesefotball.no.

– 3 livsviktige poeng, samanfattar skribenten.

Alle lag har 3 kampar att. Øystese ligg under nedrykksstreken med 15 poeng, 2 bak Trio frå Kvinnherad. Kvinnheringane tapa for Varegg i helga.

Øystese har ut frå tabellen ein hakket tøffare sesonginnspurt enn Trio. 2 av kampane til Øystese, mot Frøya og NHH, er på heimebane, medan den siste er på bortebane mot nettopp Trio. Trio skal før den tid møta Trott på heimebane og Djerv på bortebane.

Neste Øystese-kamp er mot Frøya laurdag.


I divisjonen under har Norheimsund kome seg på beina att etter ein svak periode med 4 strake tap. Fredag slo laget Valestrand Hjellvik 2–1 på bortebane, etter at vertane tok leiinga tidleg i kampen. Jens Ivar Melås og Marius Ø. Hevrøy stod bak måla til laget frå Kvam.

Norheimsund har berre 1 heimekamp att, mot Kvernbit komande fredag. Etter den kampen ventar borteoppgjer mot Fri og Voss.

Sjansane til opprykk er mest teoretiske, for Norheimsund ligg 6 poeng bak Voss på 2.-plass. Voss har dessutan 1 kamp til gode og avsluttar som nemnt på heimebane mot kvemmingane.




Siste Nytt:

24. September 2019

Tok gull i Bergen