Publisert 25. februar 2019 kl. 18.00.

Lesaren skriv: Rockekonsert i Eikelandsosen

Torsdag 21. februar arrangerte Lions Club Fusa rockekonsert og dans for folk med nedsett funksjonsevne. Konserten blei arrangert for 3. året på rad og er eit samarbeid mellom Lions-klubbane i Os, Samnanger, Kvam og Fusa.

Ein fantastisk kveld med mykje glede, latter og dans. På scena var Tutti Frutti frå Samnanger, Os swingklubb og Fusa Rockeklubb. Hovudsponsor var også i år Fusa Kraftlag.

Det var nesten full sal med kring 180 frammøte feststemte deltakarar.

Bandet Tutti Frutti frå Samnanger opna konserten. Tutti Frutti blei leia av Anne-Lise Nesteby. Det var stort engasjement i bandet, og repertoaret spente frå Abba til Kaptein Sabeltann. Nesteby fortel at bandet har 8 engasjerte deltakarar og at dei har halde på i ca. 25 år. Dei avslutta med Kaptein Sabeltann med etterfølgjande stor applaus frå salen.

Så var det Os Swingklubb sin tur. Det var andre året dei var med på konserten. Dei opna med elegant og flott svingdans etter eige program. Vidare engasjerte dei heile salen i dans og marsj. Swingklubben engasjerte, det var høg stemning og mykje glede i salen.


Fusa Rockeklubb stilte opp for 3. året på rad med utstyr og instrument. Dei spelte flott, variert dansemusikk. Dei opptredde med 3 forskjellige samansetningar og dei engasjerte publikum og Lions-medlemmene på dansegolvet.

Fusa Rockeklubb er ein klubb som tilbyr ungdomar frå Fusa og omegn musikk- deltaking og utvikling innanfor rock og andre musikkområde.

Me synest det er utruleg kjekt å spela for desse ungdomane, og kjem svært gjerne tilbake neste år, uttrykte dei med eit stort smil.

Etter mykje aktivitet på dansegolvet serverte Lions pølse og brød, brus, kaker og kaffi, som blei sett stor pris på. Dette var sjølvsagt gratis.

Dette samarbeidet mellom Lions-klubbane er eit engasjement som vi synest er svært meiningsfylt, og vi får god tilbakemelding på tiltaket frå målgruppa og pårørande.

Egil Samnøy,

Lions Club Fusa