Invitasjon til prøvesmaking

Heradsstyret har oppretta eit brukarpanel som skal kontrollera kvaliteten på middagane som vert serverte brukarar innan helse og omsorg i Kvam. Dette er sjølvsagt eit positivt (og nødvendig) tiltak. Som me kan lesa i HF 19. februar har det teke tid å få dette brukarpanelet i gang med å utføra oppgåva si, men no skal visst brukarpanelet endeleg vera invitert til prøvesmaking 27. mars. Ein kan gå ut frå at produsenten er orientert om at denne datoen skal maten dei produserer verta evaluert (i alle fall no etter at det har stått på trykk i HF).

Skal det vera noko truverde av resultatet til eit slikt brukarpanel, bør/skal dei sjølvsagt ikke inviterast til prøvesmaking, men møta opp uanmeldt. Dersom prøvesmakinga er basert på ein invitasjon, vil maten testdagen mest sannsynleg vera av ypparste kvalitet. Dette er sjølvsagt hyggjeleg for brukarpanelet (og for brukarane innan helse og omsorg denne dagen), men ingen prov på at maten dei øvrige dagane er av same gode kvalitet. Dersom det er ein invitasjon som ligg til grunn for prøvesmaking, blir heile kvalitetsvurderinga kun ein parodi og ingen evaluering av generell matkvalitet, som vel var meininga med brukarpanelet.

Til slutt ein liten oppfordring: Når brukarpanelet er på sin inspeksjonsrunde, snus gjerne litt ekstra ut i lufta i middagssalen om de kan kjenna den gode angen av nylaga middagsmat som skapar god stemning og skjerpar appetitten. Nett slik som i «gamle dagar».

Sverre Ugletveit