Publisert 15. februar 2019 kl. 11.27.

Kan verta «årets festival»


Bygdalarm konkurrerer mot mellom andre Øyafestivalen i Oslo og Palmesus i Kristiansand om tittelen.


1. mars deler interesseorganisasjonen Norske konsertarrangører (NK) ut prisane «årets festival», «årets heilårsarrangør», «årets nykommar», «årets konsertbilete» og «årets plakat» for 2018.

Bygdalarm er ein av fem finalistar i kampen om førstnemnde pris.

I tillegg til Øyafestivalen og Palmesus konkurrerer Bygdalarm mot Fjellparkfestivalen i Flekkefjord og Oslo World i Oslo.

Det er medlemene i NK som skal røysta fram vinnarane.

Festivalsjef Ida Sørheim seier at nyhendet var ei kjekk overrasking.

– Særleg etter at det første året på ny stad gjekk så bra. Det er veldig kjekt å verta finalist i lag med andre festivalar som er mykje større enn Bygdalarm. Det viser at det kan vera kjekt å vera på festival på bygda òg, seier ho.

Ho trur omgjevnedane, profilen og ramma til Bygdalarm gjer at festivalen skil seg ut.

– Og sjølvsagt speler det ein rolle kva for artistar som kjem. Eg kan tenka meg at det er grunnane til at me erutpeikte, seier ho.

– Me håpar at folk røyster på oss, og så får me sjå korleis det går.


Elles seier Sørheim at planlegginga av årets festival ligg greitt an.

– No har me vore gjennom eitt år, så me veit kva som skal gjerast vidare og om me skal gjera noko annleis. Eg trur me har god kontroll. Det er alltid meir som skjer når det nærmar seg.

Ho fortel at fleire har meldt seg som frivillige no enn i fjor på denne tida. Frivilligstaben nærmar seg full på fredagen.

– Det er kjekt og positivt, seier Sørheim.

Tone Østerdal, dagleg leiar i NK, seier i ei pressemelding at det har komme inn rekordmange bidrag til årets kåring.

– Nivået på nominasjonane har aldri vore høgare. Mange arrangørar jobbar hardt med sosialt entreprenørskap, inkludering, mangfald, tilgjengelegheit, innovasjon og teknologi, for å nemna noko, seier ho.

I fagjuryen, som har vald finalistane, sit Pål Dimmen, rådgivar i Music Norway; Rhiannon Hovden Edwards, dagleg leiar i Musikkutstyrsordningen; Eirik Blegeberg, journalist i Musikkmagasinet/Klassekampen; Daniel Ramberg, musikksjef i NRK P3; Tord Litleskare, sjefredaktør i musikkmagasinet GAFFA Norge, og Guro Kleveland, redaktør i Ballade.


• Lengtar du etter sommar og festivalstemning? Sjå biletserie frå fjorårets Bygdalarm her.