Bak, frå venstre: Even Kristoffersen (Fiskum fruktpresseri), Henrik Siversson (Thon Hotel Lofoten), Halvor Holtskog (Nyhuus gard) og Erling Rosted Furseth (Solhøi sider). Framme, frå venstre: Karl-Kristian Muggerud (Fiskum fruktpresseri), Hilde Ruud (Fiskum fruktpresseri), Kari Nyhuus Holtskog (Nyhuus gard), Martin Bech-Ravn (Solhøi cider) og Geir Henning Spilde (Spildegarden). Foto: Fredrik Solstad

Spildegarden gjekk til topps

Spildegarden i Øystese vann ein klasse for andre året på rad i eplemost-, sider- og fruktvintevlinga til Hanen og Norsk eplefest.

Med fantasi

Det var i klassen eplemost med fantasi verksemda i Kvam gjekk til topps med produktet Spildemost raud, melder arrangørane i ei pressemelding.Spildegarden var ikkje den einaste hardangerverksemda mellom dei tre beste. Eplajuice Discovery frå Sjuragarden i Norheimsund kom på 3.-plass i klassen for årets reine eplemost. Edel eplemost frå Åkre gård i Sørfjorden kom på 3.-plass i den same klassen som Spildegarden var med i, og fekk dessutan 2.-plass i klassen for årets sider. Vindpust eplesider frå Hardangergutane i Sørfjorden enda på 3.-plass i den same klassen.

Aldri vore fleire med

Tevlinga har vore skipa til i ti år, og 40 deltakar frå 11 fylke stilte opp med over 130 produkt. Aldri før har så mange vore med.Styreleiar i Norsk eplefest, Eivind Lønheim, meiner at dei dugande og kvalitetsmedvitne produsentane er opptekne av konkurransen, som skal ha ein kompetent jury med bakgrunn frå mat og drikke. Organisasjonen gler seg over at interessa for norsk most og sider aldri har vore større, og viser til salstala til Vinmonopolet.Sensorikar og Nofima-tilsett Mats Carlhøeg meiner tevlinga er viktig for å få produsentane til å halda på den gode kvaliteten. Tevlinga får dei til å strekkja seg lenger og utforska, meiner han, og trur kvalitet er viktigare enn mengd for produsentane.