Om Mostad-motstand
Overskrifta frå HF på fredag om «Mostad-motstand som møtte motstand» treng utfyllande kommentarar. Det har sitt utgangspunkt i at det nokre dagar før heradsstyremøtet 2. oktober kom opp ei ekstra sak på saklista frå rådmannen, med tittelen «politisk forhandlingsutval – kommuneplanen». Som utfyllande informasjon til saka – utanom forslag til samansetning av gruppa – var føljande: «Det er ytra ønskje om eit eige politisk forhandlingsutval i høve saker knytt til kommuneplanen.» Det var ikkje gjeve meir informasjon i sakspapira – t.d. kvar dette ynsket kom frå, kva mandat utvalet skulle ha, eller korleis det skal arbeide. I møtet vart det sagt at utvalet ikkje skal kunne binde formannskapet.
MDG vil påpeike at det ikkje er automatikk i at det skal vere politiske forhandlingsutval i samband med handsaming av kommuneplanar. Politiske forhandlingsutval er ikkje nødvendigvis den beste måten å sikre demokratiske prosessar og fagleg fundament for kommuneplanen på. Det gjev større makt til einskildrepresentantar og deira høve til å forme problemstillingar. MDG føreslo å ikkje opprette utvalet, då vi meiner at dei fagleg tilsette i Kvam herad bør kunne handtere arbeidet med motsegn frå fagstyresmaktene. Det vil sikre oss ein kommuneplan i størst mogleg grad basert på kunnskap. MDG meiner dette er særleg viktig på bakgrunn av det kontroversielle forslaget om oppdrett ved Kvamsøy som kom inn i kommuneplanen i siste liten, og vart vedteke av eit knappast mogleg fleirtal i formannskapet. No har planen vore på høyring, og det er varsla motsegn frå fleire hald. Det er grunn til å minne om at det framleis er formannskapet som eig kommuneplanforslaget. Eit politisk forhandlingsutval vedtatt av heradsstyret gir utvalet større tyngd og legitimitet, men diverre potensielt på kostnad av fagleg basert kunnskap og demokratiske prosessar. Heradsstyret har allereie delegert svært mykje av makta si i delegeringsvedtak gjort i starten av perioden, og må ikkje seie frå seg endå meir makt.
Kari Mostad,
folkevald for MDG
