– «Nye» Breidablik var eit slit

Det utvendige arbeidet med turlagsanlegget på Breidablik vart avslutta måndag 24. september, opplyser byggmeister Bjørn Vike til avisa Hordaland.

Det stod 27. september att ei vekes arbeid innvendig. Hytta får 29 sengeplassar, pluss madrassar, mot ti soveplassar tidlegare. Den nye hytta vert teken i bruk til sommaren.

– Dette er eit stort løft som eg vonar folk får glede av, seier byggmeisteren til avisa på Voss.

Han har hatt ei rekke byggjeoppdrag med turisthytter i høgfjellet opp gjennom åra. Breidablik er ein av dei mest spesielle jobbane byggmeisteren har hatt, seier han.

Breidablik ligg vêrutsett til, men på ein nydeleg plass, seier Vike, som fekk snøvêr dei siste dagane før avslutninga.

Vike har tidlegare bygt mellom anna Skålatårnet og turlagshyttene Vending og Gullhorgabu i fjella ved Hamlagrø i ein 35 år lang innsatsperiode for turistforeininga.

Byggmeisteren forstår dei som synest det er trist at den gamle hytta måtte rivast. Samstundes var ho delvis i dårleg stand.

– Når det er sagt, er eg audmjuk for alt arbeidet som er gjort der oppe. Det er eit livsverk som er utført, som eg har all respekt for, seier Vike.

Vike seier det har vore mykje slit, våte kle og frosne fingrar for dei som har bygt opp Breidablik.

– Eg veit ein del om det, sidan eg har jobba så mykje med bygging på tilsvarande plassar, seier han.

Under arbeidet har bygningsmennene brukt opp all steinen som Bjarne og Anne Marit Huse hadde ført til Breidablik. I tillegg har dei supplert med tjue tonn stein frå nærliggjande område.

Bergen og Hordaland turlag kjøpte Breidablik for kring éin million kroner. I tillegg har laget investert sju millionar kroner i nybygga. Det har vore fire hundre helikopterturar med materialtransport.

– Dette er eit bygg for framtida, seier Vike til Hordaland.

Håkon Norheimredaksjon@hf.no