Rettar merksemd mot seinskadar etter kreft

Laurdag skal Brystkreftforeininga i Voss og Kvam ha Rosa sløyfe-aksjon i Tunet i Øystese.

Temaet for aksjonen i år er seinskadar.

I ei pressemelding frå Kreftforeininga og Brystkreftforeininga står det at éi av tre kvinner fell heilt ut av arbeidslivet på grunn av seinskadar etter brystkreft.

Ni av ti overlever behandlinga, men mange opplever seinskadar som kronisk utmatting, smerter og nerveskadar, konsentrasjonsvanskar, hevingar i armane og dårleg hukommelse.

For mange vert det ekstra vanskeleg å gå tilbake til arbeidslivet, seier Ellen Harris Utne, styreleiar i brystkreftforeininga.

Ei fersk undersøking blant medlemene i organisasjonen viser at nesten 70 prosent var borte frå jobb i eitt år eller meir på grunn av behandlinga. Tre av fire overlevande med seinskadar meiner seinskadane har ført til nedsett arbeidsevne.

I undersøkinga fortel dei fleste kvinnene at arbeidsgivaren var svært skjønsam, men at det ikkje er synonymt med at han la til rette.

– Viss arbeidsgivarane ikkje er flinke nok til å legga til rette, fell mange kvinner ut av arbeidslivet. Det er alvorleg, seier Anne Lise Ryel, generalsekretær i Kreftforeininga.

Om lag 3.400 kvinner får brystkreft årleg i Norge.