Drama enda med tap
To straffespark til Øystese. Sogndal-utvising. Likevel enda det med heimetap i Norheimsund i dag.
Dramatikken kom like brått som regnet og vinden, og det viste seg symbolsk nok å vera ein motvind for blåtrøyene.
På stillinga 1–2 fekk Øystese straffespark og gjestene ein spelar utvist. Målvakta til Sogndal redda skotet til Jens Aase. Like etter vart Aase felt i straffefeltet, og det var duka for eit nytt straffespark. Denne gongen var det kaptein Sebastian Skåre Tune som måtte sjå sin overmann i motstandarmålet.
Øystese heldt fram ein intens sluttspurt for å få utlikninga, og sende målvakta i angrep heilt på tampen. I staden for utlikning enda hjørnesparket med at Sogndal-spiss Jerome Adams som kunne trilla ballen i det tomme Øystese-målet. Lite meir skjedde enn at domaren bles i fløyta.
Gjestene tok leiinga i kampen før pause, før Knut Eriksen Eide utlikna etter eit hjørnespark som førte til fleire store målsjansar på rappen. Kort tid etter sende Jerome Adams Sogndal 2 i leiinga att.
Gjestene hadde med fleire spelarar frå A-lagsstallen til Norheimsund.
Med siger kunne Øystese ha passert motstandaren på tabellen. I staden er det no fem poeng opp til Sogndal 2 i kampen mot nedrykk. Laurdag ventar Fana på bortebane for kvemmingane.