Mykje stod på spel for både Norheimsund og Inter Bergen i siste serierunde. Begge låg langt nede på tabellen, i lag med Bjarg 2, med 14 poeng kvar før kampen. Dei to nedste laga ville rykka ned til 6. divisjon. Den tredje siste plassen var usikker, og avhengig av resultata i dei andre avdelingane i divisjonen. Då spelarane gjekk av bana, var nedrykk eit faktum for Norheimsund. – Det kjennest forferdeleg. Me følte litt at me rykte ned etter kampen førre helg, men det var ei moglegheit for at me skulle klara å unngå det, sjølv om det var mykje som skulle til, seier spelande trenar Eivind Madsen Skeie. Han seier at laget fekk vita i løpet av andre omgang at nedrykket var uunngåeleg. Bønes slo Frøya i avdeling 3. Bønes måtte tapa for at Norheimsund skulle ha ein sjanse. Det endelege resultatet vart 2–1 til Inter Bergen. – Me hadde ballen mykje, men produserte ikkje dei store sjansane. Dei største fekk me på dødball. Me hadde mange slike, men litt for få avslutningar. Det har vore ein gjengangar i heile år, seier Skeie.
