Kaffistova på Breievne

Breievne fortel at ho har teke imot gaida grupper til garden og kafeen i nokre år. Ho har ogso freista halda litt ope i feriar tidlegare. No skal ho halda ope i fem timar kvar dag fram til midten av august.

For kaféstyraren kan kreativiteten taka overhand. Ho prøver difor å halda seg til ein fast meny i år. Mange etterspør saltmat, fortel ho.

På menyen står mellom anna suppe, spekemat, mjølkekaker, retrokake og pæreslush. Breievne byd fram det ein kan produsera lokalt.

– No prøver eg å halda meg til denne menyen, so eg ikkje jamt skal finna på nye ting jamvel om det er mest gøy, seier kaféverten.

– Arbeidslysta og kreativeten kan vera eit problem. Eg må tøyma meg litt, ler Breievne.

Satsar på pære

Pæreslushen er eigentleg pæremost frå garden. Ho tilset noko sitron for å gjera han friskare. Slushen må ha eit visst sukkerinnhald for å frysa.

Å jobba med pære er utfordrande. Sukkermolekyla i pæra er ulik dei i annan frukt som eple, forklarar ho. Attpåtil er det ikkje syre i pæra. Det kan verta veldig flatt, utdjupar Breieevne.

Ho prøver å leggja sider av pære og har utdanna seg til pommelier på Hjeltnes i Ulvik. På bringa har ho fått på plass eit gulleple som teikn på utdanninga.

– Eg har lyst til å laga god pæresider, seier Breievne.

– Me har dei minste sidertankane i Hardanger, skrattar Breievne og peikar på to tankar i produksjonslokalet.

– Eg skal ikkje verta stor på nokon ting. Me er små i alt me gjer. Det er berre for å visa folk tradisjonane og at dette er fyrste stoppet på veg innover i Hardanger, seier pommelieren.

Retrokake er ein klassisk pai som Breievne fyller med frukt eller bær etter kva ho har tilgjengeleg i sesongen. På Breievne vert det dyrka eple, pære, bringebær, blåbær og solbær.

Pommelieren kallar paien for retrokake av di oppskrifta minner om paiane frå barndomen hennar.

Utsalet på Breievne har vidare opningstider enn kafeen. Utsalet er stort sett ope, fortel fruktbonden. Ho har fått laga nye skilt som skal seia kva som er ope av utsal og kaffistove.

Færre på fylkesvegen

Kaféverten har sett færre turistar på fylkesveg 576 gjennom Strandebarm enn tidlegare år.

– Det er påfallande færre turistar etter vegane og færre turbussar, bubilar og personbilar. Me bur so tett på vegen at me merkar det veldig godt, forklarar Breievne.

Ho lurer på om årsaka er at dei køyrer andre stader enn gjennom Strandebarm. 

Breievne tek imot små grupper som kjem frå Bergen med gaid. Ho har laga ein kulturminnesti som ho tek turistane med på.

Til kaffistova er det flest turistar som har leigt bil og syklistar som kjem, fortel ho. Det kjem folk frå heile verda, men mest europearar, seier ho.

Gjester i sola

Medan Anne Lise held på å førebu serveringa denne dagen, kjem Max Geldner syklande. Han har halde på ei stund; sykkelturen starta i Göteborg.

I dag har han sykla frå Utne og skal vidare til Fusa og taka ferja til Os. Frå Bergen skal han taka toget til Oslo og ferja derifrå til Kiel.

Tyskaren kjem frå Stuttgart sør i Tyskland. Han tykkjer det er varmt i sola denne dagen. Yr.no varsla 24 gradar i skuggen.

Han er veldig glad for kaffistova på Breievne. Det er det einaste tilbodet han har sett frå vegen i Strandebarm. Han såg Strandebarm Bistro på Bru, men slo fast at det var stengt der.

Per Vistnes og Trude Vereiede skulle eigentleg sigla til fiskevêret Kalvåg i Nordfjord. Men der var det so mykje kaldare, so dei snudde nasen sør- og austover frå Bergen, der paret bur. I staden var dei til Rosendal dagen før, før dei kom til Bakka i Strandebarm.

Dei to hadde funne kaffistova på Breievne på nett og la til kai på Bakka av di det er i gangavstand frå Breievne.

– Det var berre to kilometer å gå, fortel Trude Vereide.

Dei to kom i prat med tyskaren på sykkel. Han hadde lært seg nok norsk med appane Duolingo og Babbel.

Satsa som godt vaksen

Anne Lise er 11. ættled på Breievne. Slekta har halde til her i 320 år, seier ho.

Sjølv voks ho opp i Fevik på Agder. Mor hennar kom frå det området. Deretter budde ho om lag tjue år i Oslo-området.

Det var fyrst som 47-åring at Breievne flytta heim til Strandebarm. Ho hadde tre vaksne born som vart verande på Austlandet.

Attåt fruktdyrkinga, gardsmaten og kaffistova driv Breievne med veving. Ho vev mellom anna bringeklutar og breiaband til bunad i glasstova på garden.