Setjefylkesmannen vedtok i 2008 at reguleringsplanen for eigedomen er ugyldig. Fylkesmannen i Hordaland har fleire gonger bede Kvam herad orientera han om kva som vert gjort vidare for å følgja opp vedtaket og oppheva planen. Etter fleire purringar frå Fylkesmannen gjennomførde heradet eit møte med tiltakshavaren og Fylkesmannens miljøvernavdeling i november 2009.

Ifølgje brev frå planavdelinga i Kvam herad er referatet frå møtet ikkje offentleggjort enno av di tiltakshavaren har bede heradet om å halda det hemmeleg. Bakgrunnen var at han ynskte å orientera naboar og politikarar om planane for eigedomen fyrst. Lokalpolitikarane får informasjonen onsdag, og etter orienteringa vil heradet offentleggjera referatet.

Siv Aksnes og Niels Peter Hærem, som representerer eigarane av ein av naboane til herregardseigedomen på Eikenes, meiner det er i strid med god forvaltingsskikk å ikkje publisera eit referat på oppmoding frå ein av partane i ei sak. Dei meiner også heradet mildt tala har forsømt seg ved å ikkje følgja opp vedtaket til setjefylkesmannen tidlegare.

Aksnes og Hærem skriv i eit brev til planutvalet i dag at dei reagerer på at orienteringa i møtet ikkje stod oppførd på den opphavlege innkallinga. I ettertid har heradet informert om orienteringa i den opne timen på den kommunale heimesida. Dei viser til at det same har skjedd i Eikenes-saka før, og spør seg om det kan vera ein medviten strategi for å sleppa kritiske merknader frå råka partar eller ålmenta.

Aksnes og Hærem oppmodar om at Kvam herad avviser planane til Martens og opphevar den ugyldige reguleringsplanen. Kvam herad har på side skriftleg hevda at planen er gyldig også etter at setjefylkesmannen slo fast det motsette.