Vakna til lyden av mann med brekkjern

– Eg var ikkje i tvil om at han hadde uærlege hensikter, seier Berit Johanne Myklebust.

Myklebust såg ein mann med eit brekkjern og eit skjerf kring munnen nærma seg Optiker Bjelland AS då ho kika ut vindauget rundt klokka 3 natt til onsdag. Ho hadde vakna til lyden av raske skritt på isen utanfor huset.

Ikkje i tvil

Myklebust høyrde eit smell, noko ho trur kom av at gjerningspersonen brukte brekkjernet eller slo i veggen med det. Då ein bil kom køyrande frå Grova, gjekk mannen og gøymde seg på huk bak ein mur.

– Då eg såg brekkjernet, var eg ikkje i tvil om at mannen hadde uærlege hensikter, seier ho.

Myklebust ringde politiet straks. Deretter såg ho at mannen gjekk i retning Vikøy, og ho såg han ikkje igjen etter det.

– Eg veit ikkje kva som gjorde at han gjekk, om han var nervøs eller hadde registrert at han var blitt sett. Ingen alarm hadde gått, fortel Myklebust til HF.

– Sjølv om det var ekkelt, er eg glad for at eg såg han, seier ho.

Ho trur det var lyden av mannen som gjorde at ho vakna. Ho seier at han gjekk med tydelege steg, og at det ikkje høyrdest ut som han prøvde å snika seg fram. Kanskje kan det tyda på at det var ein uerfaren person, tenker ho.

Ikkje forsøk på innbrot

Per Algrøy, operasjonsleiar ved operasjonssentralen i Vest politidistrikt, fortel at politiet fekk melding om innbrotsforsøket 02.58 natt til onsdag.

Politiet rykte ut til staden. Ifølgje politiloggen var det ikkje gjort innbrot, og det fanst ikkje tydelege spor etter eit innbrotsforsøk, seier Algrøy.

Myklebust skriv på Facebook at politiet køyrde etter ein kvit varebil i retning Vikøy.

Algrøy stadfestar at politiet stoppa ein bil og tok personalia, men ingen vart arresterte.

Hans Kristian Bjelland, dagleg leiar i og medeigar av Optiker Bjelland AS, seier at han sjekka dørene i dag tidleg, og at dei såg fine ut.

Vaktselskapet hadde sjekka bakdørene og sett at det ikkje var spor i snøen ved dei, fortel han.

– Eg tenker minst mogleg om dette. Ingenting er skadd og ingenting stole. Me har det me treng av gode dører, alarm med tilknyting til vaktselskapet og forsikring. Me kan ikkje gjera så mykje meir, seier han.

For berre fire dagar sidan vart det meldt om eit ran med kniv i Øystese. Bjelland trur ikkje dei to hendingane har nokon samanheng.

– Det er to vidt forskjellige hendingar. Det i Øystese var på dagtid, og det var tre personar pluss eit barn innblanda. Dette var på natta, og berre éin person. Eg trur det er tilfeldig, seier han.

Bjelland seier at det her var ein observant nabo som følgde med, og han oppmodar folk om å melda frå til politiet om dei ser noko.

– Elles kjenner me oss ganske trygge, seier han.