Kva med å sjekka soga?

Fredag 2. november kunne me lesa i HF at Nedre Valland og Nes grendelag har fått tilsegn om inntil 108.500 kroner til sikring av «båtbyggjarverkstaden» i Holmsund.

No er det berre det at det ikkje har vore noko vesentleg båtbygging i Holmsund. Dette skreiv eg om i avisa tysdag 6. november, og rekna med å få svar frå grendelaget. Eg forstår at det eg skreiv, anten ikkje har nådd fram til rette vedkomande, eller at det skal teiast i hel. Vonar det ikkje er det siste.

Eg ser òg at heradet er kopla inn for at grendelaget ikkje skal betala moms. Dette skaper presedens, og eg reknar med at andre frivillige lag og grupperingar kan få same sørvisen frå heradet. Museet er òg på banen.

Problemet er berre at grunnlaget for søknaden er feil. Det kan ikkje vere slik at ein privatperson kan skrive om soga og oversjå fakta.

Eg vil gjerne be om å få sjå søknaden frå grendelaget, anten i avisa eller tilsendt meg. Sjølvsagt kan eg vende meg til Bergen og omland friluftsråd, men eg trur det vil stille grendelaget i eit dårleg lys. Det er direkte historisk feil at det er bygt båtar i Holmsund.

Når det blir søkt om midlar til prosjekt, må opplysningane til dei som løyver midlar, vere korrekte. Det er søkjarane som har plikt til å gi rette opplysningar. Om ikkje dei er rette, må midlane sendast i retur.

No vil eg sjå søknaden, for opplysningane må vere feil. Og eg oppmodar HF om å trykkja opplysningane som er sendt inn, om ikkje søkjaren reagerer.

Ove-Kjell Sakseid