Publisert 23. oktober 2018 kl. 00.01.

Sakna mann funnen død


Mannen som vart meld sakna i Steinsdalen i går, er funnen død.


Det skriv Vest politidistrikt i ei pressemelding.

74 år gamle Norvald Gamlem frå Norheimsund vart funnen i Movatnet klokka 09:25. Dei pårørande er varsla.

Politiet har ingen grunn til å tru at det har skjedd noko straffbart, skriv operasjonsleiar Morten Rebnord.

Mannen vart meld sakna etter at han ikkje møtte opp til ein turavtale klokka 10 måndag. Ein kamerat oppsøkte bustaden hans i Steinsdalen, men mannen var ikkje heime. Mobiltelefonen hans låg att i huset, fortalde operasjonsleiar Stein Rune Halleraker ved operasjonssentralen i Vest politidistrikt til HF måndag.

Klokka 15:45 måndag starta leiteaksjonen. Norske redningshundar, Røde kors og politihundar deltok i aksjonen, som vart leia av lokalt politi.

Aksjonen heldt fram frå det vart lyst rundt 07:30 tysdag morgon.

Halleraker fortalde måndag at mannen ikkje var i god fysisk form, og at politiet frykta at noko kunne ha skjedd med han. Politiet undersøkte saka før dei sette i gang leiteaksjonen. Ein fann ingen indikasjon på kor han kunne vera, og leitte i nærleiken av heimen.