Heidrar nynorskkommune

Kulturdepartementet skal dela ut 100.000 kroner til årets nynorskkommune. Kommunar og fylkeskommunar må sjølve søkja om å vera med i kampen om pengane.

– Vinnaren vert ein nynorskkommune eller -fylkeskommune som tek særleg godt vare på den nynorske målforma. Nynorsken er under press, og i desse tider med både kommune- og fylkessamanslåingar er det ekstra viktig at nynorskkommunane gjer godt og medvite arbeid for målforma. I år vil me derfor særskilt oppmoda kommunar eller fylkeskommunar som skal slå seg saman, om å søkja om å få prisen, seier Margrethe Kvarenes, seksjonssjef i Språkrådet, i ei pressemelding.

– Me vil heidra nynorskkommunar som brukar og synleggjer målforma både i skular og barnehagar, i norskopplæringa for innvandrarar og i marknadsføringa av kommunen, seier Kvarenes, som leier juryarbeidet på vegner av Kulturdepartementet.