Meiner tida ikkje er inne for tingrettskrav

Fellesnemnda i Ullensvang, Odda og Jondal ynskjer kamp for tingretten. Ullensvangordførar Solfrid Borge (Sp) meiner nemnda er med på å skapa splid.

Nemnda vedtok torsdag, mot røystene til ordførar Solfrid Borge (Sp) og Olav B. Hus frå Ullensvang, å uttala seg om saka. Framlegget frå jondøling Olav-Magnus Hammer (Ap) lyder slik, med eit tredje punkt føreslege av ordførar Jon Larsgard (Sp) i Jondal.

«1. Fellesnemnda ser det som svært viktig at Hardanger tingrett vert oppretthalde og utvikla i Ullensvang kommune.

2. Uttalen vert sendt som eit innspel til arbeidet med strategidokumentet i Hardangerrådet.

3. Fellesnemnda ber om at arbeidsgruppa for strategidokumentet skal leggja fram selskapsavtale med tilhøyrande styringsdokument til handsaming i tråd med tidlegare vedtak.»

– Bør kunna samla oss

Nemndleiar Roald Aga Haug (Ap) fortel at det fyrst vart stemt over framlegget skulle handsamast i det heile teke. Der røysta Borge, Hus, Larsgard og jondalsvaraordførar Reidun Haugen Dalseth (KrF) mot. Dei to siste støtta altså framlegget då det vart realitetshandsama.

Haug seier det var ein uvanleg saftig debatt i nemnda om saka.

Olav-Magnus Hammer seier at det i ordskiftet vart framsett påstandar om at det kan vera eit mål med tingrettsutspela å undergrava heile regionsamarbeidet mellom Hardanger-kommunane og Voss herad. Både Haug og Hammer avviser at det er målet.

Haug seier han framleis har vanskar med å forstå kvifor det skal vera vanskeleg å samla seg om å ynskja ei teneste alle vil ha i Hardanger. Han påpeikar at det ikkje ligg føre noko ultimatum om at Voss, som i dag soknar til Nordhordland tingrett, skal slutta seg til tingretten på Lofthus.

– Dette burde me klara å stå samla om, seier han.

Ryddige prosessar

Ordførar Solfrid Borge (Sp) meiner møtet torsdag var feil tidspunkt for å ta saka opp. Ho viser til at det er nedsett ei arbeidsgruppe som skal forma strategidokumentet, som skal leggjast fram for kommune- og heradsstyra, pluss dei innblanda fellesnemndene, i haust.

– Eg er oppteken av ryddige prosessar. At ein skal leggja føringar no, meiner eg er feil. Det er ikkje ein god start på samarbeid å grava fram gammalt grums. Eg meiner dette ikkje handlar om tingretten, men om frykta for Voss. Det er ei ærleg sak som ein bør seia høgt i staden for å bruka andre ting for at me ikkje skal koma vidare, seier Borge.

Ho ser ikkje bort frå at det kan dukka opp fleire skjer i sjøen, men meiner ein må starta prosessen med eit ope sinn og samla seg om det ein kan vera samd om.

– Å starta med å stilla krav er ein kile som skapar splid. Eg trur me må samarbeida for å berga tingretten i regionen, seier ho.

Hammer undrar kven Borge har snakka med sidan ho meiner utspelet frå fellesnemnda undergrev samarbeidet. Borge seier ho ikkje har snakka med vossingane om saka i det heile.

Møter tingretten fredag

Ein part i saka ho har tenkt å snakka med, er Hardanger tingrett. Borge har fått i stand eit møte mellom ordførarane og tingretten på Lofthus fredag. Ho vil prøva å få informasjon om prosessen til domstolskommisjonen og kva kommunane bør leggja vekt på. Ho håpar også å få avklara om så små tingrettar som på Lofthus er liv laga, eller om det krevst eit regionalt samarbeid med Voss og Kvinnherad for å berga tilbodet.

Borge seier ho er sjokkert over den store debatten som har oppstått.

– Me er i ein prosess med interne dokument som har leke ut. Er det nokon som arbeider for Hardanger tingrett, så er det meg. Ein vert litt sjakk matt. Det skapar heller ikkje noko godt samarbeidsklima i samanslåingsprosessen, seier ho.

Tek opp saka måndag

Ullensvang heradsstyre møtest måndag. Medlem Terje S. Bleie (H) har sendt ordføraren eit spørsmål om tingrettssaka før møtet. Han er i tvil om det er semje om plasseringa av tingretten, og vil vita om det er usemje i Hardangerrådet.

– Det må i alle høve ikkje vera tvil om kva Ullensvang heradstyre meiner om saka, skriv Bleie.