Publisert 31. august 2018 kl. 14.00.

Vann sjansestatistikken, men tapte kampen


J13-laget til Tørvikbygd spela årets beste kamp, ifølgje trenarane. Likevel tapte laget 5–8 mot Varegg tysdag.


– Eg tykkjer me var det beste laget. Varegg skåra på nesten alle sjansane dei hadde, medan me sleit med å få ballen i mål, seier kaptein Alida Skår Måge.

Trenar Jarle Måge er samd.

– Dette var ein veldig positiv kamp. Me skapte fleire målsjansar enn Varegg. Med litt betre utteljing hadde me vunne, seier han.


Vanskeleg å vera liten

Laget frå Tørvikbygd har spela åtte kampar og tapt alle. Trenaren trur ein liten tropp er ei viktig årsak til at laget har slite.

– Me er eit lite lag frå ei lita bygd. Motstandarane har ofte langt fleire spelarar i troppen enn oss. Dei kan kvila spelarar undervegs i kampane og setja innpå friske bein når våre spelarar vert slitne, fortel han.

Som så mange lag som slit, har laget vore aktivt på overgangsmarknaden i sommar. To–tre jenter frå Strandebarm skal spela for laget i haust. Dei mange nye spelarane gjer truleg at laget går frå å heita Tørvikbygd til å heite Tørvikbygd–Strandebarm.


God nykomar

Hanna Øygard er ein av dei nye spelarane. Ho har tidlegare spela og trena med eit mixlag i Strandebarm og var ein av dei beste spelarane på banen.

– Det var eigentleg ganske lett å spela i denne kampen. Eg er van med å spela med gutar i Strandebarm, fortel ho.

Trenar Måge fortel at spelarane stort sett har teke tapsrekkja med fatning.

– Konkurranseinstinktet er sterkare hos nokre enn hos andre, men tapa prellar av på dei fleste og dei kjem på neste trening med friskt mot. Likevel hadde det gjort godt med ein liten opptur. Held me fram slik som i dag, trur eg den kjem, seier han.

Dei yngste laga frå Tørvikbygd spelar i den såkalla Hardangerserien og møter andre lag frå Kvam. J13-laget møter berre lag frå bergensområdet. Det kan trenaren godt tenkja seg å endra på.

– Det vert mykje reising og mange seine kveldar når me skal spela borte mot lag frå Bergen. Me skulle gjerne vore ein del av ein lokal serie med lag frå Kvam og kanskje frå Kvinnherad. Me får sjå om dette lèt seg gjera til neste år, seier han.