Publisert 30. august 2018 kl. 21.04.

Kvemming spela EM-kvalik


Det norske volleyballandslaget slo Spania 3–2 i EM-kvalifisering laurdag. Ein kvemming spela ei viktig rolle i sigeren.


Rune Froestad Fasteland, som har ei fortid i Rossvoll volleyballklubb og spelar i ein belgisk klubb, spela kampen. Ifølgje lagleiar Jan Egil Tvinde har Fasteland vore ein viktig spelar. Han har spela alle kampane i kvalifiseringa.

– Me hadde kniven på strupen i denne kampen. Utan siger hadde me vore ute av kvalifiseringa. Prestasjonane til det norske laget svinga. Me var veldig gode i dei setta me vann, og dårlege i dei setta me tapte. Heldigvis var det godt nok til å vinna. Rune var god til å sørva, god i blokk og rimeleg bra i angrep, seier han.

Tvinde fortel at sjølv om Spania ikkje er heilt i verdstoppen, er landet ein stor volleyball-nasjon. Noreg har aldri vunne over Spania tidlegare.

Noreg har att ein bortekamp mot Georgia og ein heimekamp mot Kviterussland i kvalifiseringa. Begge kampane vert spela i januar. Tvinde fortel at dersom Noreg slår Kviterussland 3–0 eller 3–1, samstundes som Spania tapar mot kviterussarane, har Noreg moglegheita til å kvalifisera seg gjennom å verta eit av dei fem beste toarlaga i kvalifiseringa.


Fasteland var ikkje den einaste kvemmingen i troppen. Også Isak Helland-Hansen hadde fått landslagsplass. Han var uheldig og braut eit bein i ein finger på ei trening, og kunne ikkje spela.

Kampen vart spela i Kongstenhallen i Fredrikstad.