Eit realistisk tunnelval for Hardanger
– Ein kort tunnel vil gjera livet enklare for dei fleste, skriv innleggsforfattarane.
No har Kvam fått eit tilbod me ikkje kan seia nei til. Tunnelane i Tokagjelet er utgåtte på dato for lenge sidan. I tillegg kjem rasfaren, sommar som vinter. Alternativet til Tokagjelet er ein ny tunnel. Lang eller kort. Langt fram i tid, eller snart. Dyr, eller billeg. Tenleg for nokre, eller for alle. Ein kort tunnel finansiert med bruk av rassikringsmidlar kan la seg realisera i løpet av få år. Ein lang tunnel under Kvamskogen ligg uansett langt fram i tid. Kanskje aldri. Då lyt me slita med dagens Tokagjel i lang tid framover, kanskje for alltid. Med jamlege stengingar, og frustrasjon for alle som er avhengige av vegen. Fv 7 er Kvam sin sjukehusveg mot Bergen. Når E 16 er stengt, er kaoset på Fv 7 komplett. Det er enno veldig lenge før ein ny E 16 kan opnast.
• Les også: Lang tunnel vil gje svært høge takstar.
Ein kort tunnel vil gjera livet enklare for dei fleste. Trygg og rask veg mellom Kvamskogen og Steinsdalen. Kortare og tryggare reise til eller frå Bergen for dei fleste i Hardanger. Forskjellen tidsmessig mellom lang og kort tunnel er liten (5–6 minutt). Det vert langt større forskjell i bompengesatsane. Ein lang tunnel vil kosta langt meir enn den smakar. Med ny tunnel til Kvamskogen vil også gjennomgangstrafikken auka. Ikkje minst med tanke på at Jondalstunnelen reduserer bompengesatsen. Dette styrkjer også Hordalandsdiagonalen. Kvamskogen er viktig for Kvam. Ein ny tunnel vil skapa trygg veg og nye moglegheiter her. Kvam treng meir aktivitet.
• Les også: Tid for å meina
Me er alle avhengige av trygge og framkomelege vegar. Det vil vera svært uklokt å gambla vekk ein kort tunnel, i draumen om ein mogleg lang. Me vil ha ei billeg, god og rask løysing no!
JA til kort tunnel!
Geir Ove Neteland,
Suldal Transport AS
Jostein Mo, Jan Mo AS
Frode Børven, Frode Børven Transport
Henrik Steine
Bertil Ove Skeie
Svein Stuve
