Publisert 19. juni 2018 kl. 16.45.

Kjartan Lauritzen avsluttar Bygdalarm


«Fredag»-artisten står på scena på «meieritomta» i Norheimsund laurdagen. Også klubb på Straumen kjøpesenter står på programmet.


Lauritzen – som eigentleg heiter Per Áki Sigurdsson Kvikne – er frå Balestrand i Sogn. I fjor gav han ut ep-en Fenomenet etter å ha hatt stor suksess med låtane Fredag og Havanna.

Då han opptredde på Bergenfest førre helg, sprengde han kapasiteten på andrescena, «Bastionen».

Bygdalarm omtalar Lauritzen som ein «rap-superhelt» på nettsida si, og rår festivalgjengarane til å starta kondisjonstreninga og pussa danseskorne med det same.

Fredag er det heavy metal-bandet Kvelertak som er høgdepunktet. Bandet har halde på sidan 2007. Det nyaste albumet, Nattesferd, vart gitt ut i 2016.

Før Kvelertak speler Hjerteslag, som vitja Kvam i juli fjor. Bergensbandet spelte under Hardingfest, som vart arrangert i Holmatun som ei mellombels erstatning for Bygdalarm.

Litauisk-syrisk-svenske Silvana Imam varmar opp for Kjartan Lauritzen laurdagen. Ho er den første rap-artisten som har fått prisen «årets artist» under svenske Grammisgalan, og albumet Naturkraft har vorta hylla av både publikum og kritikarar, skriv Bygdalarm på heimesida si.


Elles står Hajk, Great News, Mikhael Paskalev og of Montreal på festivalscena.


Forvandlar kjøpesenteret

Klubb vert det òg, og også i år er det to klubbar.

Festivalen lovar «heime-aleine-fest» når det skal stellast i stand diskotek i kjøpesenteret Straumen i Norheimsund. Fredag skal Safri Trio stå for musikken, medan DJ Evil Mustache og The Librarian (Nils Ove Børve og Theresa Wallevik) steller i stand «Bygdaboogie» laurdagen.

Klubb Nistagato – i eit telt utanfor Naboen pub – byr på DJ-ane Romskip, Great News, Shakanaka og MultiTati.


Noko for dei spreke

Er ikkje headbanging og dansing nok mosjon for helga, vert det som vanleg Lurkalarm – triatlonen frå fjorden i Øystese til Fitjadalsvatnet – torsdag 5. juli. Fredag vert det både motbakke- og nedoverbakkeløp når deltakarane i Bygdalaup skal springa frå det gamle festivalområdet i Øystese til det nye i Norheimsund, via toppen av Torefjell.

Elles vert det bygdepub i Holmatun, med premieutdeling, kviss og musikk, etter Lurkalarm.

Mads Berven Trio speler på torget i Norheimsund under Badnalarm laurdag.