Bad deg glad!

Skvulp, plask, dykke under, vaske håret i saltvatn med ei såpe som heiter Miranda, kaste termometeret uti, kjenne kulden legge seg inntil meg som ein glatt ål, skli vidare under vatnet, leike, bli varm av den livlege aktiviteten, over, under, så sand, solgløtt viss eg er heldig, så skunde meg med å skifte. Eg skal vere på jobben om 5 minutt!

Eg slår eit slag for symjing. Det er ei fantastisk god treningsform og ein umåteleg frisk aktivitet. Visste du at når du badar i saltvatn, så bidrar saltet til å fjerne giftstoff frå huda? Døde hudceller forsvinn, og minerala stimulerer produksjonen av nye celler. Ha! Ingen vits i å bruke tusenvis på dyre kremar.

Då eg var lita, var bading det store. Vi formeleg budde uti vatnet, søskenbarnet mitt Eva Elisabeth og eg. Time etter time stod vi på hendene, dykka og stupte. Fekk aldri nok. Kvitlen i Dalaelva, Geitabruhølen i Fitjadalen og Gullfiskvatnet var populære badeplassar. Det er fasinerande korleis born ikkje kjenner kulden, men berre gleda når dei badar. Har vi vaksne noko å lære av borna?

I Noreg har vi ikkje alltid varme somrar. Vi opplever at sommaren kan vare nokre dagar, etterfølgt av veker med regn. Dette skjedde i fjor sommar. Eg var på stranda i Øystese, og nesten ingen var uti for å bada. Det var for kaldt i vatnet. Månaden var juli. Det gjekk opp eit lys for meg der og då. Det er jo berre å hive seg uti, Liv Helena, sa ei stemme til meg. Dette er det du har. Kvifor skal du reise til Spania for å bade? Greitt nok at du gjer det av og til, men du er jo så himla heimekjær, så du må berre skjerpe deg og ta i bruk det du har! Eg formeleg heiv meg uti. Kulden slanga seg rundt kroppen min som den sleipaste ålen i verda. Eg var seld! Kjensla eg fekk etterpå, var så magisk at eg fekk dilla, rett og slett. Seinare bada eg på fjellet, i elva og ein dag heiv eg meg uti isbrevatnet i Fjærland. Lukke!

Mange vaksne kjem med den typiske kommentaren: «Øh. nei, eg badar ikkje før det er 20 grader i sjøen, eg.» Kva med å snu litt på det faste som du har sagt i alle år? Vil du ha betre hud? God helse? Det er enkelt, og det er lett. Berre hiv deg uti!

Fleire kvemmingar badar allereie mykje, nokre året rundt. Eg er så imponert over dykk! Det er førebiletleg i mine augo. Bading i sjøvatn kan påverke vår generelle helse. Nettopp fordi sjøvatn er så rikt på så mange vitale element, så har det evna til å aktivere kroppens helbredande mekanismar og styrke immunforsvaret vårt, seier hudterapeut Grethe Marie Grimen.

I helga bada mange menneske, med ordføraren i spissen (kul fyr!), på stranda i Øystese for å feire at Hardangerbadet kjem. Det at vi kvemmingar skal få ta del i dette, synest eg er stort. For sjølv om eg elskar å bade ute, så er eit skikkeleg basseng inne ikkje til å forakte. Då har vi begge delar! Vi er heldige!

Liv Helena Skeie-Rubio

Kjelder: https://www.kk.no/livstil/derfor-er-det-bra-a-bade-i-saltvann-67813174 henta 16.04.18