Andreas Skogseth (t.h.) har fått ny jobb. Her er han saman med Åsmund Bakke i eit møte i Jondal i vinter. Arkivfoto: Sigbjørn Linga

Skogseth vert ny reiselivsdirektør

Andreas Skogseth (35) vert ny reiselivsdirektør i Hardanger.

Han overtek etter Hans Jørgen Andersen til hausten. Skogseth er i dag dagleg leiar i Visitfonna AS i Jondal.

Han har tidlegare arbeidd som prosjektleiar for utviklinga av skiturisme i Fjord Norge og vore tilsett ved Finse 1222, melder Reisemål Destination Hardanger Fjord AS i ei pressemelding.

Styreleiar Borghild V.Vik seier mange kvalifiserte søkte.

– Me er trygge på at Andreas er rett person til å leia arbeidet med å fremja og utvikla Hardanger som besøksmål. Andreas har brei røynsle frå arbeid med marknadsføring, produktutvikling og innovasjon i reiselivet. Han har skjøtt stillinga si som leiar ved Fonna Glacier Ski Resort på ein særs god måte, seier Vik.

Styreleiaren opplyser at sesongutviding og auka verdiskaping per turist vil vera viktig for Skogseth.

Skogseth er glad for tilliten. – Hardanger er ein av dei fremste reiselivsregionane i Noreg, og området har gode leverandørar som tilbyr opplevingar i verdsklasse. Spanande og kontrastfylte naturopplevingar og ei rik kulturhistorie gjer Hardanger til ein region med eit breitt spekter å spela på, seier han.

Skogseth leiar no prosjektet med å få på plass eit nytt velkomstsenter på Folgefonna. Han skiftar jobb fyrst i haust. Andersen held fram i stillinga så lenge det er naudsynt.