Rassikker veg i Tokagjel

Ja, like rassikker veg som dei fleste vegane på Vestlandet. Fylkeskommunen skisserte i haust 670 millionar til rassikring i Tokagjelet.

Bind saman Snauhaugtunnelen og Hansagjeltunnelen med ein ca. 300 meter lang tunnel. Sikra plantefeltet på eigedomen til Bård Steien ved å saga ned den nedste skogen over vegen, og støypa ein mur over vegkanten så der ikkje kjem jordras ned i vegen.

Lenga Fossagjeltunnelen med ca. 200 meter opp til den øvste svingen før gjelskanten. Eg trur ein kan få dette arbeidet for den skisserte summen som fylket lova. Skulle det verta nokre millionar for lite, så får ein skøyta på med pengar frå bompengane, det er vel det dei er tenkte til.

Det vert ca. 500 meter tunnel til saman. I dag driv dei ca. 5–6 meter tunnel i døgeret, det vil seia ca. 100 arbeidsdagar på to skift. Med rigging og oppstart trur eg det kan ta ca. 6 månader. Tunnelmassane får ein vel ikkje tippa i gjelet som me gjorde, så dei må i deponi oppå gjelskanten, og kan seinare seljast til vegbygging m.m. Hardanger Fartøyvernsenter vil laga ein molo, og her kan kanskje ein del massar brukast.

Då me utvida vegen og laga nye tunnelar i Tokagjelet på femtitalet, var ikkje vegen stengd ein heil dag, berre i timar. Der må drivast på natt og med stengd veg, berre open for ambulanse og utrykking. Open på heil dag, men det kan verta nokre dagar med stengd veg i påhogget av tunnelen.

Tunnelmunningane som står att etter at tunnelane er bundne saman, må ikkje lukkast, berre stengjast for bilferdsel. Det må vera anledning til rømmingsveg dersom det oppstår brann eller fare for brann i bil m.m.

Dersom fylket vil ut med pengane, kan me få rassikker veg om ikkje altfor lenge. Og så ventar me sjølvsagt på ny tunnel under Kvamskogen. Men det vert vel ei stund før den kjem?

Erling Sandven