Cupkampen mot Sogndal: Øystese leia lenge, men rauk ut

– Me visste det var ei nedslakting på veg etter første omgang, seier Øystese-trenar Gary Hogan. – No er Sogndal 2 åtvara, seier Eirik Bakke.

Det såg lenge ut til at det skulle gå Øystese sin veg under kampen mot Sogndal i første cuprunde onsdag kveld.

Første omgang var jamn, og dei første 25 minutta var prega av få sjansar til begge laga.

I andre halvdel av omgangen pressa Sogndal hardare og kom seg stundom gjennom forsvaret til Øystese, utan å skapa dei heilt store sjansane.

Så, i det 38. minutt, skjedde det: Jens Aase sette ballen i mål og Øystese tok leiinga.

Første halvdel av andre omgang heldt Øystese fram med å gi gjestane motstand, men så byrja lufta å gå ut av ballen.

Sogndal utlikna og tok leiinga med to mål på vel to minutt, i det 73. og 75. minutt.

Sogningane skåra endå to mål før kampen var slutt, og det som i ein god halvtime låg an til å verta ein overraskande siger til heimelaget, enda opp med å verta eit brutalt tap.

– Enorm vilje

– Dette var ei tøff nøtt. Øystese hadde ei fantastisk skåring i første omgang som gjorde det litt ekkelt. Me kjende godt på dét, seier Sogndal-trenar Eirik Bakke.

– Me byrja å lura på om i dag var dagen då ingenting skulle gå vegen. Men då me skåra første målet vårt, visste me at det var berre å køyra på.

– Kva gjorde at det snudde?

– Første omgang ville Øystese det meir. Dei har ein enorm vilje og ei ofring, og eg kan ikkje skryta nok av innsatsen deira, særleg med tanke på at dei har det som hobby og me har det som jobb. Men eg forventa meir av spelarane i andre omgang, og det fekk eg. Me kom oss vidare på ein komfortabel måte til slutt, men me måtte litt i kjellaren, me òg.

– Møtte de meir motstand enn venta?

– Nei, eigentleg ikkje. Av og til i løpet av kampen tenkte eg «den keeperen kjem til å redda alt». Me hadde nokre enorme sjansar. Men me sto i det, og til slutt vann me fortent. Det er sånn det skal vera.

Bakke seier han trur Øystese kjem til å overraska mange lag.

– Me møter Øystese i serien med Sogndal 2. No er me åtvara, seier han.

– Visste me kom til å bli slakta

Øystese-trenar Gary Hogan seier Øystese har mykje å vera positiv for, trass i tapet.

– Det er sjølvsagt skuffande å tapa, men i ein lang periode synest eg me gjorde det ok. Sogndal har mange gode kvalitetar og spreke og profesjonelle spelarar, så me visste det kom til å verta tøft.

– Då de gjekk på bana til andre omgang og leia 1–0, kva tenkte du då?

– Me visste at det var ei nedslakting på veg og at det kom til å verta tungt. Men me ville ikkje legga oss ned og la dei køyra over oss. Me prøvde å pressa dei høgt, og det hadde me litt suksess med. Men det er avgrensa kor mykje kroppen kan gjera, og me er ikkje like godt trente som dei.

Han seier han hadde håpa på at Sogndal skulle verta frustrerte, men at gjestane heldt seg rolege, stod i det og fekk til slutt som dei fortente.

– Du synest Sogndal fortente sigeren?

– Ja, det hadde vore galskap å seia at dei ikkje gjorde det. Viss ein hadde delt ut bonuspoeng for hardt arbeid, guts og innsats, hadde me kanskje fortent noko etter denne kampen, men Sogndal skapte mange sjansar, spelte mykje meir ball, og fortente å vinna. Men det var moro å ha ein del publikum her, å gi dei eit sjokk og ein støkk, og halda ut i ei stund.

Han seier at viss Øystese held fram med å spela på dette nivået, kan laget vinna mot lag som Stord.

– Me hadde ein skuffande seriestart mot Fyllingsdalen og mangla litt lidenskap. Det hadde me i dag.

– Tok oss på kondisen

Spiss Tonny André Tysnes synest Øystese spela ein bra kamp samanlikna med serieopninga.

– I forhold til den er me 50 hakk opp. Eg synest me var knallgode, og me har mykje bra å bygga vidare på til kampen mot Stord på laurdag.

– Torde du å håpa på siger til pause?

– Ja, eg var ikkje imponert over det Sogndal gjorde i første omgang. Me var det beste laget og fortente å leia. Men, klart, dei er best trente, og på eitt tidspunkt ville dei bryta oss ned.

– Dei tok dykk på kondisen?

– Ja. Det er tungt å ligga så defensivt som me gjorde.

– Er det surt å gå heim etter dette tapet?

– Ja, eg er litt skuffa, men det er greitt likevel. Me gjorde ein god innsats og klarte å halda på Sogndal til halvvegs uti andre omgang.