Avsluttar turné på heimebane

Martin Ulltang (24) frå Øystese vil leva av musikken. Torsdag speler bandet hans i Kabuso.

Bandet Fretless Five (biletet), som skildrar musikken sin som moderne jazzmusikk med retning mot det progressive og røffe frå fusion og rock, oppstod for om lag to år sidan. Dei fem musikarane studerte saman ved NLA Høgskolen Staffeldtsgate i Oslo.

– Me spelte i lag i mange ulike samanhengar. Til slutt bestemde me oss for å danna eit band, seier Ulltang.

I januar gav gruppa ut det første albumet. Låtane vart hovudsakleg skrivne i fjor vår.

– Me brukte berre to dagar i studio. Me har spelt inn alt samtidig, som om det var live. Det vert ganske upolert, men det er sånn me vil det skal låta. Me har fått mange gode tilbakemeldingar, seier Ulltang.

I januar la bandet ut på ein liten turné med konsertar i Lillestrøm, Bergen, Oslo, Stavanger og Trondheim. Turneen får no ei sein avslutning med konsert i heimbygda til bassisten.

– Det vert spanande å avslutta på heimebane. Eg håpar det kjem folk. Ein veit jo aldri, seier Ulltang.

Ulltang har spela bass i om lag 14 år. Han byrja tenka på å satsa på musikk då han gjekk på Kongshaug musikkgymnas i Os, med bass som hovudinstrument. Sidan flytta han til Oslo og tok ein bachelor i musikk. I dag arbeider han frilans som musikar.

– Eg får ein del oppdrag, og det vert fleire for kvart år som går. Det går mykje i småjobbar, men det er nok til å leva av. Oslo er stort, det er her det er flest folk å konkurrera med, men også her det er flest jobbar, alt frå gudstenester til teater og ulike konsertar med band og enkeltartistar. Det er variert. Målet er å etablera seg meir og få større jobbar. Eg ser stadig ei positiv kurve, fortel han.

I sommar spelte Fretless Five på Kongsberg jazzfestival, den største jazzfestivalen i Noreg. Ulltang håpar det vert spelejobbar av eit slikt kaliber i sommar.

– Det var veldig kjekt å spela der. Det er ein festival av internasjonal storleik med mange store artistar, seier han.