Kva med laksen i Øysteseelva?

Det er både laks og sjøaure i Øysteseelva. Øystese jeger og fiskarlag (ØJF) har lov til å driva kultiveringsarbeid på sjøauren. Sjøauren får me ikkje fiske på, berre ta vare på.

Laksen i Øysteseelva (ØE) har det vore lovleg å fiska på dei siste to åra. ØE er ei såkalla ikkje prioritert lakseelv av dei styrande. ØJF får såleis ikkje driva kultiveringsarbeid for villaks. Like fullt fylgjer ØJF godt med på kva som er i elva av både laks og sjøaure. Gjennom eit samarbeid med Rådgivende Biologer i Bergen, som snorklar elva, har me eit visst bilete av kva som er både av sjøaure, villaks og oppdrettslaks. Den siste typen tek me ut.

Skal me døma etter namn i elva som Lakshølen og Kjærhølen, har nok elva hatt si eiga laksestamme i tidlegare tid. Ut frå protokollane til ØJF har nok stamma vorte supplert med laks frå særleg Eidfjord og Botnen.

Villaksen i dag er av typen mellom- og storlaks. ØJF arbeider med å ta ut oppdrettslaksen for å unngå innblanding i den vesle villaksstamma som er i elva.

Øystese jeger og fiskarlag

Elveutvalet v/Leiv Sandven