Jan Mo-saka, ei skam
Mange hugsar nok at Frank Mohn i si tid hadde planar om ein fabrikk i Steinsdalen. Eg veit ikkje om det var somling frå heradet si side som flytte satsinga vidare til Fusa. Men eg veit at heradet med dette miste ei storbedrift og hundrevis av arbeidsplassar.
I Kvam har me eit par entreprenørar av Jan Mo AS sitt kaliber. Men det verkar som om Jan Mo må «kniva meir» for å få oppretthalda bedrifta si.
I ei årrekkje har dette firmaet flytta frå skanse til skanse, utan at noko permanent har dukka opp.
Vekk frå grustaket, der var vegen for dårleg og plassen for liten. Vekk frå Busdalen, der var det planlagt barnehage (som ikkje vart noko av). Vekk frå Evjo i Øystese. Ikkje ein ideell stad p.g.a. støy og støv og midt i glaninga, skjønar me. Men for bebuarar kloss i ein travel fylkesveg vil risting, støy og støv vera ei kontinuerleg plage. Døgnet rundt, vil eg tru!
Jan Mo AS er ei solid bedrift og yter sitt i form av arbeidsplassar og kommuneøkonomi, vil eg tru. Men ein plass må eit firma som treng massedeponi, plass til lastebilar og andre transportmiddel, samt folk og utstyr, landa? Ikkje kom her og fortel at ikkje firmaet sjølv har leita med lys og lykte etter ein høveleg landingsstad. Det vert for lettvint å seia.
No bør kommunen leggja godviljen til, så ein av dei dyktigaste innan sitt område har «liv laga» framover. Underteikna skjønar seg lite på politikk, men eg skjønar såpass at ein stad går grensa.
Me er etter kvart mange som deler Jan Mo As sin frustrasjon i denne saka.
Sjå opp og fram: Heia Kvam? Opp av bakevja: No er det Jan Mo sin tur!
Gerd Ø. Vaagen, Vikøy
