Det er mogleg å lage ei vakrare sjøfylling i Øystese?

På tynt grunnlag og rekordrask tid er det vedteke nok ei sjøfylling i Øystese, denne gongen utanfor det komande Hardangerbadet og hotellhagen. Dette for å erstatte parkareal som blir nedbygd av Hardangerbadet og for å utvikle sjølina i Øystese.

Landskapsmessig har Norheimsund sundet og Sandvenholmen som sin føremon. Øystese har den vide bukta, stranda og fjordsynet som sin. Eg meiner utvikling og inngrep i større grad skal dyrke desse kvalitetane og gi bygdene kvar sitt særpreg. Med utgangspunkt i dette må ikkje fyllinga i Øystese leggast som skissert med rette liner, men heller strekkast i ein naturleg boge framfor Hardangerbadet. Mot elveosen kan fyllinga formast som ein odde i staden for ein mura molo. Ei slik landskapsforming vil vera harmonisk og gi folk betre kontakt med fjorden, anten dei er utanfor eller inne i Hardangerbadet. Forslaget mitt inneber også sjøfylling, men i langt mindre grad enn den som er planlagd og truleg til ein langt lågare kostnad.

Spør gjester, turistar og innbyggjarar kva som er det finaste med landskapet i Øystese. Eg er viss på at dei aller fleste vil seie det vide fjordsynet og den store stranda.

Som inspirasjon for vakker landskapsforming og badeplass ved hjelp av fylling, er til dømes Koigenparken på Hamar eit godt tips.

Vel meint frå ein i Norheimsund som likar vidsynet i Øystese.

Geir Madsen