Frakta til Haukeland med helikopter etter arbeidsulukke

Ein mann frå Kvam fall i samband med arbeid på ein garasje.

Litt over klokka 12 torsdag rykte politiet og helsepersonell ut til Fykse etter ei melding om ei fallulukke.

Mannen, som arbeider i eit lokalt firma, fall frå andre til første etasje under bygging av ein garasje ved eit hus på Fykse. Fallet var på under tre meter, opplyser politibetjent Anne Siri Tysseland ved Kvam og Samnanger lensmannskontor.

Mannen vart frakta til Haukeland universitetssjukehus med luftambulanse.

Operasjonsleiar Terje Magnussen i Vest politidistrikt seier til Bergens tidende at mannen skal ha vore så og seia medvitslaus då meldinga kom inn, men at han var vaken og orientert då han vart frakta til sjukehuset.

Tysseland fortel at skadeomfanget er uvisst. Arbeidstilsynet har vorte varsla, noko som er vanleg rutine ved arbeidsulukker.

Politiet er no ferdige med undersøkingane på staden.

– Det er for tidleg å trekka noko konklusjon, seier Tysseland.