– Uforståeleg at saka hastar

Rådmann Arild M. Steine tek i eit notat til heradsstyret eit kraftig oppgjer med Hardangerbadet AS. Han meiner det påståtte hastverket er grunnlaust.

Notatet er eit svar på ein førespurnad frå Frp om å kommentera opplysingane som kom fram sundag. Då vart det kjent at Innovasjon Noreg er tvilande til økonomien i drifta av anlegget i Øystese, og at fleire grunnleggjande vilkår for å få lån ikkje er stetta (sjå lekk til høgre).

– Me er ingen flaskehals

Steine meiner e-posten provar at Kvam herad ikkje har vore flaskehalsen i prosjektet, og skriv at han har vore utsett for press for å få saka ferdig, men utan å få vita om synspunkta til finansinstitusjonane. Heller ikkje han fekk tilgang til informasjonen før sundag. Han hevdar at nokre av krava som finansinstitusjonane har framsett, har han sjølv stilt til Hardangerbadet undervegs, men at han berre har fått motkrav om politisk handsaming.

– Hardangerbadet har utfordringar med å leggja fram eit realistisk driftsbudsjett, fullteikna aksjekapital, langsiktige leigeavtalar og tilfredsstillande tryggleik for gjelda. Kvifor det hastar så mykje med å få saka handsama i heradsstyret, er uforståeleg. Eit eventuelt vedtak før alle brikker er på plass, forsterkar behovet for ytterlegare krav om vilkår i saka, skriv Steine.

Han meiner argumentasjonen for hastverket er den same no som i 2015, då saka kom som hastesak rett til heradsstyret i august: føreseielege rammer for dialogen med investorar og finansinstitusjonar. Det gamle vedtaket treng inga stadfesting før Hardangerbadet har arbeidd vidare med prosjektet, meiner rådmannen.

– Prøver å føra på villspor

Han skriv at Hardangerbadet prøver å leia heradsstyremedlemene inn på eit villspor ved å krevja eit årleg driftstilskot som svarar til innsparinga ved å leggja ned tre av dagens kommunale basseng. Han meiner det kan føra til ein utilsikta kommunal risiko og endåtil vera brot på reglar for offentleg stønad og offentlege innkjøp. Uansett viser driftsbudsjettet til Hardangerbadet at det ynskte tilskotet i praksis er subsidiering av kontordelen. Han viser til at husleiga som Hardangerbadet drift AS skal betala til det kommunale føretaket, 1,8 millionar kroner, er monaleg lågare enn leiga som Hardangerbadet drift skal betale det private eigedomsselskapet for lokale som kostar monaleg mindre.

– Det er lett å sjå at badeanlegget skal subsidiera kontordelen, og at ein er avhengig av kommunalt bidrag for å lukkast med det, skriv Steine, som meiner mogeleg konkurransevriding og subsidiering må vurderast av heradsstyret dersom tilskotet skal ytast.

Eit tiltak mot subsidiering kan vera å skilja badeanlegget ut som eit eige selskap, og å vurdera om Kvam herad bør eiga og driva heile anlegget. Det er risikabelt, men gjev i det minste kontroll, skriv rådmannen.

Slaktar alternativ kalkyle

Hardangerbadet har utarbeidd og distribuert eit rekneark som viser kva selskapet meiner det vil kosta Kvam herad å driva dagens basseng vidare og å satsa på Hardangerbadet. Rådmannen tek til motmæle. Han skriv at det er feil at spelepengane kan auka, og at alternativet ikkje må vera å driva vidare alle tre bassenga og eventuelt byggja eit nytt.

– Hardangerbadet undervurderer autoriteten til heradsstyret når det trur at heradsstyret kjem til å behalda to basseng og byggja eit nytt dersom Hardangerbadet ikkje vert bygd, skriv han.

Hardangerbadet har i sine alternative kalkylar teke med 600.000 kroner i eigedomsskatt. Både talet og framtida til skatten er usikker, skriv Steine, som meiner det kan få uante følgjer dersom politikarane skal innføra eit prinsipp om å øyremerkja skatten til enkeltprosjekt eller avgrensa område.

Rådmannen meiner besøkstala bør vurderast på nytt. Hardangerbadet meiner dei er nøkterne sidan dei er justerte ned til 61.500, men det talet inkluderer berre enkeltbillettar, ikkje årskort og gjester frå hotellet og helsedelen. Totalen er såleis kring 90.000 besøk i året. Ettersom det stipulerte talet i 2015 var mellom 70.000 og 100.000, bør gjestepotensialet vurderast på nytt.

Han minner om at Vossabadet og ADO arena har opna sidan sist saka var oppe, og at Hotel Ullensvang har oppgradert badefasilitetane i mellomtida.

– Generelt er det bygd fleire bad i Noreg sidan den gongen, så potensialet for å vera ein magnet i nasjonal målestokk er noko redusert, skriv Steine.

HF har i kveld sendt notatet frå Steine til dagleg leiar Martin Vik i Hardangerbadet AS og bede om kommentar, så langt utan respons. Me kjem attende med eventuelle kommentarar.

Lovar å senda alt

HF spurde i går Vik når Hardangerbadet fyrst opplyste rådmannen om utspela frå Innovasjon Noreg, og når krava om eigenkapital og husleigeavtalar skal vera stetta. Svaret var følgjande:

– Bankane ventar på endeleg behandling til heradsstyret har gjort vedtak i saka 12. desember. Husleigeavtalar og eigenkapital vert oversende til bankane.

HF har også bede Vik opplysa kven som arbeider med helsedelen i bade- og helseanlegget. Svaret er at det er danna ei gruppe som skal skildra aktivitetane i helsedelen. Han viser også til at det i november vart inngått ein intensjonsavtale med Tryg forsikring. Avtalen seier at partane har intensjon om å inngå ein samarbeidsavtale om mogeleg behandling og rehabilitering av Tryg-kundar. Avtalen viser til det enno ikkje stifta selskapet Helse i Hardanger AS, som skal kartleggja og planleggja aktivitetar for å skapa eit nytt og innovativt, tverrfagleg helsetilbod med fokus på muskel og skjelett, ernæring og indremedisin.

Stor politisk aktivitet

Sp har i kveld eit nytt gruppemøte i Kvam rådhus, etter den siste utviklinga i saka.

I går hadde Sp, KrF og H sams gruppemøte i Øystese. Ordførar Jostein Ljones (Sp) sa tidlegare i dag til HF at det jamt over var stemning for å strekkja seg meir enn rådmannen tilrår i sakspapira, og å yta bassenginnsparinga som tilskot, men at konklusjonen ikkje var eintydig. Han uttala seg vel å merka før notatet frå rådmannen vart sendt ut i ettermiddag.

Frode Nygård (Frp) seier at hans parti er fast bestemt på å ikkje støtta kommunalt engasjement i Hardangerbadet på dei vilkåra som ligg føre i dag. Borghild Storaas Ones (Ap) seier Ap vil setja seg godt inn i saka, og at partiet truleg vil be om eit gruppemøte tysdag når det er klart kva andre framlegg som ligg i bordet.