Ungdomsrådet om budsjettet

Kollektiv-, lærling-, fritids- og helsesystertilbodet, pluss trafikktryggleik, opptek Kvam ungdomsråd.

Ungdomane bed om at det vert arbeidd for ordninga «heim for ein femtilapp» og at Kvam får eit betre kollektivtilbod til utkantane av kommunen. Det er for dårleg at siste buss frå Norheimsund til Strandebarm går i eittida kvar laurdag, meiner rådet, som ynskjer seg eit eige skysskort internt i kommunen for dei mellom 12 og 18 år.

Rådet har lyst på fleire lærlingplassar i faga elektro, teknisk og industriell produksjon (TIP), bygg og forskaling. Eitt verkemiddel er å stilla krav om lærlingplassar i anbodsprosessar, meiner dei unge, som oppmodar heradet om å ta meir ansvar for å leggja til rette for praksisplassar for dei som vel alternative utdanningsløp.

Rådet meiner Kvam treng uorganiserte fritidstilbod, og ynskjer at det vert vurdert å senka prisen på til dømes kulturskulen for å senka også terskelen. Dessutan bør det lagast eit betre oversyn over fritidsaktivitetane på den kommunale heimesida, ifølgje rådet.

Tilbodet om helsesyster på skulane bør både utvidast og gjerast meir synleg for å nå dei som slit med psykisk helse. Også tilbodet for mjuke trafikantar bør betrast fleire stader, til dømes ved Øysteseheimen, i Vikøy sentrum og ved busstoppet ved Steinsdalsfossen, meiner det unge rådet.

Heradsstyret skal drøfta innspela og vedta budsjettet tysdag.