Medan dagleg leiar Martin Vik (bak) i Hardangerbadet AS meiner det er naudsynt med ei avgjerd tysdag, ser ikkje ordførar Jostein Ljones (Sp) vekk frå ei utsetjing. Er ikkje heradsstyremedlemene trygge på kva dei vedtek, må saka utsetjast, meiner han. Arkivfoto: Bård Valvatne

Ser ikkje vekk frå utsetjing av Hardangerbadet-avgjerd

Ordførar Jostein Ljones (Sp) utelukkar ikkje utsetjing av avgjerda. Tidspresset er ikkje ideelt, meiner han.

– Saka er utruleg innfløkt, sa Erna Tveitnes då rådet for menneske med nedsett funksjonsevne hadde ekstramøte for å drøfta Hardangerbadet fredag.

Rådet støtta utan merknader tilrådinga frå rådmannen om å gje grønt lys for tiltaket, men debatten var ikkje merknadslaus.

– Det er ein del uavklara moment. Vert ein del av dei avklara før heradsstyremøtet tysdag? sa rådsleiar Marie E. Skutlaberg.

– Nei, sa ordførar Ljones, som deltok i møtet.

– Kvifor kan me ikkje venta når dei uansett ikkje kan byrja byggja før i februar? spurde Gunnar Helle.

Ljones forklara at årsaka er at pristilbodet frå entreprenøren Lab i utgangspunktet går ut ved nyttår.

I tolvte time

Sakspapira kom tysdag kveld, ei veke før avgjerda skal takast. Tysdag morgon klokka 8.30, rett før heradsstyremøtet, vert det ekstramøte om saka i formannskapet. Ljones vedgår at hastverket ikkje er ideelt i ei så stor sak.

– Heradsstyret kan seia at saka ikkje er klar om ein kjenner seg veldig utrygg. Me må vera trygge på at me tek ei rett avgjerd, sa Ljones.

Ernst Olsen, som ivrar for prosjektet, argumenterte i møtet i rådet mot utsetjing. Han meiner tilbodet frå Lab AS er unikt lågt til fastpris å vera. Han fryktar at prosjektet vert mykje dyrare om avgjerda vert utsett. Ljones sa at eit vedtak om utsetjing inneber at Kvam herad i alle fall må drøfta vilkåra med partane i saka.

Artikkelen held fram under annonsen.

Ville yta meir

Olsen var parat til å føreslå å yta om lag åtte hundre tusen årlege kroner ekstra frå den kommunale drifta i tillegg til det rådmannen føreslår å akseptera, men han droppa framlegget ettersom han innsåg at det uansett ikkje ville få fleirtal.

Pengane er kronene heradet sparar på å leggja ned tre kommunale basseng. Olsen meiner summen er liten i den store samanhengen, og at prosjektet har så mange gode sider at det er verdt endå større raustleik.

Han ramsa opp skatteinntekter, attraktivitet, auka handel, arbeidsplassar og helsedelen som gode argument. På minussida finn han berre tapet av bassenget i Ålvik og av det opne, grøne området i Øystese sentrum. Det må gå an å finna nokre hundre tusen i året til å driva fyrstnemnde basseng vidare, og sistnemnde lunge får ein delvis att med den kommunale utfyllinga framom badeanlegget, meiner Olsen.

– Det er så mykje som er positivt at ein ikkje må vera for snau med dei åtte hundre tusen. Det er ikkje tvil om at Kvam vil tena på å gå inn for dette, sa han.

– Ikkje vanleg å ta med

Stabs- og økonomisjef Anita Hesthamar opplyste, som svar på spørsmål frå Lisbeth F. Oma (KrF), at det ikkje er vanleg å rekna med generelle skatteinntekter, til dømes eigedomsskatt, i talgrunnlaget for investeringsavgjerder. Årsaka er at det ligg mange usikre føresetnader i slike reknestykke.

Ordføraren sa at dei nemnde inntektene er usikre og diffuse, og at ein må retta seg etter realitetane i budsjetta dei neste åra. Han minte om at kommunen har store utfordringar og investeringar i vente.

Tilleggsytinga som Olsen ynskte, vil medføra at kommunen yter om lag femten millionar kroner i «tap» i drifta i tillegg til det reine tilskotet på 23 millionar kroner og tomt.

– Eg ynskjer badet, men ikkje å kutta i kommunale tenester, sa Ljones, som omtala seg som ein sunn skeptikar. Han hadde fredag enno ikkje teke stilling i saka.

Hesthamar sa på vegner av rådmannen at det har vore ein klar føresetnad heile tida at bassenginnsparinga skulle dekkja kapitalkostnadene som låneopptak og forskotering av spelestønad medfører. Dei åtte hundre tusen utgjer ein vesentleg skilnad i reknestykka for Kvam herad, framheva ho.

– Tilskot til avkasting

Ljones viste til at den private aktøren har lagt inn eit avkastingskrav på sju prosent i driftsbudsjetta. Etter hans syn er eit sentralt spørsmål om det er rett at Kvam herad skal gå i minus for å sikra at selskapet stettar eit slikt krav. I saksutgreiinga skriv rådmannen at Hardangerbadet AS kan redusera kravet for å unngå å gjera seg avhengig av årlege utbetalingar frå den kommunale felleskassa i mange år.

– Er det rett at kommunen skal gje tilskot til avkasting på privat kapital? spurde Ljones i møtet.

Han sa at bakgrunnen for avkastingskravet er at bankane stiller strenge krav til finansieringa. Bankane har enno ikkje gjeve tilsegn om lån, opplyste han.

– Skanse til skanse

– Eg sit med ei kjensle av at kommunen er pressa frå skanse til skanse av private aktørar, sa Gunnar Helle, og minte om at vilkåra i 2015-vedtaket ikkje er stetta.

Han ville vita kva helsedelen i den tredje høgda skal gå ut på. Ljones sa at mellom andre Stener Kvinnsland skal arbeida med å fylla høgda med aktivitet, og at Hardangerbadet AS skal ha ein intensjonsavtale med Tryg forsikring om leige av lokale. Det er likevel uvisst kva planane vil føra til av sikre inntekter.

Rådsmedlem Marit Heidi Seim sa at det viktige for Kvam herad er at tiltaket ikkje på nokon måte set tenestene til brukarane som rådslemene representerer, i fare.