Innovasjon Noreg: – Usikker på økonomien i driftsselskapet

Innovasjon Noreg (IN) er usikker på økonomien i drifta av den private delen av Hardangerbadet. For å gje lån, stiller IN fleire vilkår som ikkje er stetta enno.

H, KrF og Sp hadde i kveld sams gruppemøte i eit klasserom på Øystese gymnas. Truleg handla ein del av ordskiftet om ny dokumentasjon som politikarane fekk på e-post av ordføraren tidlegare i dag. E-posten vart formidla på vegner av dagleg leiar Martin Vik i Hardangerbadet AS.

E-posten røper at det truleg vert svært vanskeleg å få bade- og helseanlegget finansiert om ikkje dei vel åtte hundre tusen kronene som Kvam herad sparar på bassengnedlegging, vert skotne inn i drifta av det private driftsselskapet. Sjølv med dette tilskotet er Innovasjon Noreg usikker på driftsøkonomien.

Krev solid aktør

Det går fram av ein e-post frå avdelingsleiar for vekstbedrifter, Sveinung Dukstad, til Martin Vik 28. november. E-posten fortel at lånebehovet er kring 78,5 millionar kroner, og at Innovasjon Noreg i utgangspunktet må yta eit risikolån på 50 millionar. Renta på lånet vil vera 4,7 prosent, som er mykje høgare enn renta i driftsbudsjetta Hardangerbadet AS har presentert.

– Med ei slik rente er det vanskeleg å sjå at prosjektet vil verta lønsamt, skriv Dukstad.

Han lanserer fleire alternative løysingar for å redusera trongen for risikolån, og meiner den andre av følgjande er den beste.

• At ein solid aktør gjev såkalla attkjøpsgaranti på kring 75 millionar kroner, altså forpliktar seg til å kjøpa anlegget om det må til.

• At ein solid aktør garanterer å dekkja lånekostnadene i ein periode, til dømes sju år.

Dukstad skriv at det er utfordrande å finna ei god finansieringsløysing i prosjektet. Han skriv at før noko lån vert ytt, må eigenkapitalen må vera fullteikna og forplikta i tråd med finansieringsplanen. Framleis manglar ein del millionar både i den kommunale og private delen av anlegget, ifølgje sakspapira. Dukstad krev dessutan at langsiktige leigeavtalar må vera signerte, og den totale leiga må vera minst like høg som budsjettert.

– Langt meir utfordrande

Eit anna vilkår er at banken må ha gjeve eit forpliktande lånetilbod. Det er ikkje gjort. I ein e-post til Vik 6. desember skriv Lars Audun Torvik i Sparebanken vest følgjande:

– Dersom sikre inntekter frå kommunen med 895.000 per år fell vekk, vil det gjera det langt meir utfordrande å få på plass ei finansiering av prosjektet. Ein vert då i større grad avhengig av utkjøpsavtalar og/eller garantiar.

Torvik opplyser at eit eventuelt lån ikkje er handsama i organ med avgjerdsmakt i banken.

– Kanskje umogeleg

I e-posten til ordføraren skriv Martin Vik at det vil vera svært vanskeleg eller umogeleg å skaffa lån til prosjektet om politikarane ikkje går med på å leggja bassenginnsparinga i potten saman med kapitalkostnadene med kommunale låneopptak.

Han meiner reknestykka til rådmannen ber preg av krisemaksimering. Vik skriv at Hardangerbadet vil tilføra Kvam herad positive ringverknader i fleng og minst 600.000 kroner i eigedomsskatt, og at spelestønaden kan auka. Han minner også om at alternativet til å investera i badet er å rusta opp dei eksisterande bassenga eller byggja eit nytt basseng.

Vedlagt e-posten er ei samanlikning som ein reknearkkunnig har utarbeidd av framhald av dagens bassengdrift og bygging av badeanlegget i Øystese. Vedkomande konkluderermed at Kvam herad kjem til å gå i i pluss heilt frå starten. Han meiner rådmannen tenkjer kortsiktig og utelét ein viktig faktor i alle økonomiske avgjerder: alternativkostnaden.

Frode Nygård (Frp) sende sundag dokumentasjonen til rådmann Arild M. Steine og bad om hans vurdering av utspela.