Hjelparar: Leikny Hesthammar (t.v.) og Astrid Skutevik fortel at dei tykkjer det er kjekt å sjå på når dei tilsette bakar. Likevel hjelper dei gjerne til om dei vert spurde.

Fekk ein smak av jul

Tysdag var det tid for julebakst i Tolo omsorg.

Bård Valvatne valvatne@hf.no

Publisert: 08.12.2017 23:01 Sist oppdatert: 09.12.2017 01:05

– I dag har me den årlege bakedagen i hus A. På menyen står mellom anna harde vaflar, serinakaker, havremakron og krumkaker, fortel pleiemedarbeidar Kari Alvsaker.

Dei tilsette tok seg av bakinga, men også bebuarane fekk sleppa til dersom dei ønskte det.

Det var ingen tvil om at bebuarane i omsorgsbustadene sette pris på arrangementet.

– Når ein har passert 85, betyr det mykje å få vera med på dette. Dette er betre enn å berre sitja åleine på rommet. Her samlast me og får ein prat og noko å bita i. Dette er storarta. Her på Tolo omsorg tek dei godt vare på oss, fortel Leikny Hesthammar.

Anne Karin Mæland er gruppeleiar ved Tolo omsorg. Ho fortel at julebaksten har vore eit fast innslag sidan 2004.

– Med bakedagen får me litt julestemning inn i omsorgsbustadene. Dette er eit veldig viktig trivselstiltak for dei som bur her. Me kan ha bakedag fordi dei tilsette er villige til å gjera dette i tillegg til dei andre arbeidsoppgåvene dei har. Mange lagar deig og førebur seg på fritida. Nokre brukar også fritida på å koma og hjelpa til med bakinga, seier ho.