Julemesse på Vassel gard. Nissen var raus med dei minste.

Vassa i jul på Vassel

Vassel gard utvidar stadig repertoaret, sist med julemesse i løa.

Tidlegare har det vore juleverkstad på Vassel i førjulstida, og det var det i år òg, nærare bestemt sundag. Dagen før trekte julemesse og julebuffé folk til gards, og det påfunnet er nytt.

Eigarane Jonny og Aud Berit Garnes sytte for god, gamal julestemning, sjølv om vêret vel å merka slo om frå blått til raudt i helga. Eigarane opna løa for 18 utstillarar og mange fleire kundar, og kaker, lykter, strikkety, nissar i alle variantar og mykje anna var å få kjøpt. Ute var det høve til å ri på shetlandsponnien Bastian, stødig ført av Tiril Eiken. I eldhuset var det songinnslag og servering av graut med mandel.

I kafeen fekk kaffi og kaker bein å gå på, og dei som åt, kunne studera utstillinga av peparkaker. Om kvelden sat 65 til bords og forsynte seg av julebuffeen med pinnekjøt, ribbe, lutefisk og dessertbord.

Eigarane er takksame for at alle har vore så positive og oppmuntrande. Aud Berit Garnes fortel at det har gått med ein del timar sidan oktober til å førebu helga.

– Me må gjera det skikkeleg. Mannen min har allereie lova ny messe neste år, så det vert nok slik, seier ho.

Paret overtok Vassel gard i fjor. Garnes legg ikkje skjul på at læringskurva har vore bratt og at den fyrste tida med gardsdrift har vore utfordrande, mellom anna av di den tekniske standen var dårlegare enn venta. Ettersom både ho og han er i arbeid attåt drifta, må dei ta eitt steg om gongen.

Eigarane har etablert ein lokal næringskafé for næringsdrivande i både landbruket og andre bransjar den fyrste torsdagen i månaden. Så langt har det fyrst og fremst vore ein møtestad. Etter nyttår er vona å få inn føredragshaldarar og ha eit tema for kvar samling, fortel Aud Berit.

Vassel gard fekk i vår vigselsrett, og det fyrste bryllaupet vart halde i mai. Garden har elles om lag fire tusen gjestedøger. Gjestene søv både i hytter, på campingplassen og på stølen som høyrer til Vassel.

Artikkelen held fram under annonsen.