Snøsmelting og nedbør gjorde Movatnet større enn normalt torsdag. Eit ras råka garasjen ved huset på biletet. Huset er evakuert. Foto: Bård Valvatne

Ekstrem ras- og flaumfare i Kvam

Heradet oppmodar folk om å rydda hagane.

– Dei store nedbørsmengdene og den høge temperaturen gjer at ras- og flaumfaren er ekstremt høg, står det på nettsidene til Kvam herad.

Heradet har sett krisestab og skal følga situasjonen tett. Alt teknisk mannskap er ute for å førebygga og redusera eventuelt skadeomfang.

Heradet oppmodar folk om å reinska stikkrenner, bekkeinntak og slukar, og å vera merksam på flate tak. Regnvatnet kan føra med seg skrot og kvistar som kan bidra til å tetta avløpssystemet. Difor er det viktig å rydda bort ting frå hagen som kan bli tekne av vassmassane, står det på nettsidene til heradet.

Tidlegare i dag gjekk det to ras i Norheimsund. To hus vart evakuerte.