Femdobla inntekt sidan 2012

Folgefonn entreprenør AS i Jondal enda som nummer 26 av 254 verksemder i Hordaland på den såkalla gasellelista til Dagens Næringsliv. Det skriv Hardanger folkeblad, som siterer eigar og dagleg leiar Oddmund Skeie på at prestasjonen ikkje har praktiske konsekvensar. Han skryter av dei tilsette i verksemda.

Verksemdene på lista må ha dobla inntektene dei siste fire åra, frå eit utgangspunkt på minst éin million, skriv oddabladet.

Rekneskapen røper at entreprenørselskapet hadde driftsinntekter på 15,9 millionar kroner i fjor, mot 13,3 millionar året før og 3,1 millionar kroner i 2012. Årsresultatet var 1,4 millionar kroner etter skatt, mot 2,1 millionar året før. Gjelda var på 3,4 millionar kroner og eigenkapitalen på 4,4 millionar kroner. Selskapet investerte i nye maskiner og nytt utstyr i fjor.

Selskapet hadde fem fast tilsette, ein deltidstilsett og ein lærling. Det hadde ikkje sjukefråvær med sjukmelding i fjor, og heller ikkje personskadar.

Jon Steinar Skeie eig 50,48 prosent av aksjane. Oddmund Skeie eig resten. Skeie fekk ei løn på 617.019 kroner i fjor.